سياسة "التكشف"!...بقلم: عمار يزلي
31-05-2015, 04:19 PM
عملا بسياسة التقشف التي انتهجتها الحكومة بعد نهاية عهد البحبوحة، وجدت نفسي ميرا على بلدية تغرف من بحر وتنحت من صخر! منتخبوها كانوا حفاة عراة قبل عشر سنوات، فإذا بأقلهم شأنا، صار مليارديرا!. قلت لهم في اجتماع لمحو الأمية: يا الخاوا، راهم قالونا لا تنهبوا كثيرا! ولا تسرفوا قليلا!! يخصنا نزيروا الحزازيم! (فقام كل من كان حاضرا برفع سرواله المتدلي وراح يشد "السنتورة"!). نطق أحدهم: وهذا "التكشف" واش هو؟ مشروع جديد؟ أنا نديه! مستعد نعطي 20 في المائة تشيبا! قلت له: "أقعد يالمرعوش، هذا مش مشروع، هذوا هم، راهم يقولولنا: بركاكم من الماكلة بزاف!". رد علي آخر: "واش بغاونا نصوموا؟". قلت له: "ماراهمش على الماكلة، راهم على التبذير! قالونا ما كانش الحفلات وما كانش العشاوات وما كانش السفريات و"الميسيونات"وما كانش الاستقبالات في "الأوتيلات الكبيرات" و"الريسطوارت الفخمات" و"الدينيات الدانصانت"!. ما بقى غي "الكاسطروطات وماء السبالات"! قال لي آخر متنرفزا: أنا عندي السكر، يخصني نفطر في كل اجتماع وحنا عندنا ست اجتماعات كل يوم، أكثر من الصلاة! يخصني ناكل، حتى في رمضان! قلت له: كول إذا بغيت، بصح مش من ميزانية البلدية والدولة راهم يقولونا!
وقامت القيامة! الجميع يندد: رانا نخدموا باطل! حنا موظفين نتاع الحكومة، تاع الدولة، تاع الشعب، تاع لالجيري!
قلت لهم بعدما أسكتهم "بالكشايف": "يخصنا من اليوم "نتقفشوا" آآه..نتقشفوا.. في الكسوة! وما كان لا "بون ديصانص"، لا "كوستيمات" لا " بريم" نتاع الوسخ والحس! وما كانش البورطابل نتاع باطل! ويخصنا، الشفافية في المصاريف! الدراهم بحح! كلاهم بوبي! تعرفوا شكون بوبي؟..هيا راكم عارفين بلاما نقولوا شكون! ولكي تكون الشفافية في الاجتماع، من الآن فصادعا، الاجتماعات تكون "بالمايو"! المايو، ما يكونش فيه الجيب، باش حتى واحد ما يدي ما يجيب! وراهم يقولولنا، نعلن عن ثرواتنا قبل 10 سنوات واليوم!". وهنا حدث اندلاع ثورة من جديد في القاعة!: باغين تعريونا.؟ هذه بلدية وإلا حمام؟(واحد قال لي: نجيبوا معنا الكاسات وإلا أنتم تعطيونا ؟) ؟ قلت لهم: أنا أول من ينزع السلاح! ها راني نقلع.. يالله أنتم أقلعوا! .. النسا أخرجوا من بعد أدخلوا! أنتم ما عليكمش!.. هاهم البشاكير نتاع الإحرام قدام الباب.. ألبسوهم! علاه أنتم خير من اليمنيين والحوثيين؟ لابسين لبشاكير كللي خارجين من الحمام ويديروا في الحرب!..يالله! قبل ما نكمل الاجتماع! هذا قرار من فوق! مش غير أحنا! قاع رايحين تتعراو قدام الشعب والتلفزيون يصور، وما كان لاش تدسوا! اللي عنده شي حاجة، يبينها!. الدراهم مشاو..على الأقل نبينوا بللي حنا ما دينا والو!
وأفيق وأنا أتقيء ضحكا!
