*يَا الوَرْدَة*
08-05-2016, 08:12 PM
*مَالُه صْفارْ لُونَكْ وَايْبَسْ بَعْدْ انْ اخْضَارْ *
وَ الغُصْنْ جَاحْ وَ ابْقَى مَنْ غِيرْ اوْرَاقْ **** يَا مَا اسْحَرْ ابْهَاكْ العُشَّاقْ
وَ كُلْ مَنْ يَنْظَرْلَكْ بَرْمَاقْ ** لَلصّبَرْ مَا طَاقْ
يَنْضَمَرْ مَشْعَالُه ** مَنْ شَافْ بَهَاكْ المَكْمُولْ
يَا الوَرْدَة مَال اوْرَاقَكْ فِي الغُصَانْ اذْبَالُوا **** وَ اصْفَارْ لُونَكْ مَثْلْ المَقْتُولْ
*كُلْ من شَاف زِينَكْ اتْخَمَّر بْلاَ عُقَارْ*
يَبْقَى شْرِيدْ تَايَهْ مذْهُولْ عْلِيلْ **** مَنْ جَمَالَكْ مَفْتُونْ اهْبِيلْ ** مَا اوْجَدْ كِي زِينَكْ فِي جِيلْ ** بَاهِي وَ اجْمِيلْ
البَدَرْ بَكْمَالُو ** عَنْدْ حُسْنَكْ اوْقَفْ مَخْجُولْ
يَا الوَرْدَة مَالْ اوْرَاقَكْ فِي الغُصَان اذْبَالُوا **** وَ اصْفَارْ لُونَكْ مَثْلْ المَقْتُولْ
*اسْألْتَكْ جَاوْبِينِي عِيدِيلِي وَاشْ صَار*
اعْلاَشْ هَجْرُوا مَنْ رَوْضَكْ لَطْيَارْ **** مَا بَقَى لَغْنَاهُمْ تَصْفَارْ
كَاللِّي مَا كَانُو كُلْ انْهَارْ** عَلَى الاشْجَارْ
اصْوَاتْهُمْ يَتْعَالُو ** كُلْ بُلبُلْ يَنْشَدْ ازْجُولْ
يَا الوَرْدَة مَالْ اوْرَاقَكْ فِي الغُصَانْ اذْبَالُوا **** وَاصْفَارْ لُونَكْ مَثْلْ المَقْتُولْ
*كُنْتِ امْسَلْيَة فِي وَسْطْ بُسْتَانْ النُوَارْ*
وَ انْتِ كِالْعَرُوسْ مَا بِينْ المَشْمُومْ **** الفَاتَحْ المُوَرَّدْ وَ اللِّي مَكْمُومْ
بْرِيحْتُه ايْفَاجِي عَالْمَهْمُومْ ** بِإذْنْ القَيُّومْ
وَ اتْزُولْ اهْوَالُه ** يَنْتَعَشْ بَعْدْ شَدَّاتْ الهُولْ
يَا الوَرْدَة مَالْ اوَرَاقَكْ فِي الغُصَانْ اذْبَالُوا **** وَ اصْفَارْ لُونَكْ مَثْلْ المَقْتُولْ
*عَذْرَاتْ يَا الوَرْدَة عَشْقُوكْ انْتِ جْهَارْ *
وَقْفُوا ذَاهْلَاتْ قُدَّامْ جَمَالَكْ **** طَالْبِينْ رِضَاكْ وَ اوْصَالَكْ
وَ يَفْنَا بْسِحْرْ اوْصَافَكْ ** كُلْ مَنْ شَافَكْ
هَاكْذَاكْ اجْرَالُه ** لِمَنْ هَواكْ وَ بْحُبَكْ مَهْبُولْ
يَا الوَرْدَة مَالْ اوْرَاقَكْ فِي الغُصَانْ اذْبَالُوا وَ اضْفَارْ لُونَكْ مَثْلْ المَقْتُولْ
*مَصْيُونْ كَانْ رٌوْضَكْ حَاطُوا بِيهْ الصُّوَارْ*
رُقْبَانْ وَقْفِينْ عَنْ كُلِّي جَانَبْ **** مَا ايْطِيقْ غَشِيمْ ايْقَرَّبْ
عَلَى البَوَابْ حُرَّاسْ تْرَاقَبْ ** أسُودْ اتْرَهَّبْ
امْحَكْمِينْ اقْفَالُه ** مَنْ اتْعَدَّا يَضْحَى مَقْتُولْ
يَا الوَرْدَة مَالْ اوْرَاقَكْ فِي الغُصَانْ اذْبَالُوا**** وَ اصْفَارْ لُونَكْ مَثْلْ المَقْتُولْ
* قَالَتْ الزَّمَانْ اتْبَدَّلْ الفَلْكْ دَارْ *
انْعَدِّي الكَاتْبَة بَالمُرْ وَ الاحْزَانْ **** نَصْبَرْ للَدَّهْرْ اللِّي خَانْ
كِي امْشَاوْ ايَّامْ السَّلوَانْ ** وَ الوَقْتْ اشَيَانْ
وَ اللِّي امْشَاوْ ارْجَالُه ** بَعْدْ عَزُّه يَصْبَحْ مَذْلُولْ
يَا الوَرْدَة مَالْ اوْرَاقَكْ فِي الغْصَان اذْبالُوا **** و اصْفَارْ لُونَكْ مَثْلْ المَقْتُولْ
*لُو انْعِيدْ قَصَّتِي قَالَتْ إيْذُوبُوا الحْجَارْ*
انْظُرْ بَعْدْ عَزِّي وِينْ اتَّرْمِيتْ **** ابْلاَ اوْنِيسْ وَحْدِي وْلاَ منْ شَفِّيتْ
بَعْدْ تَعْبِي وَ مَا قَاسِيتْ** شُوفْ وَاشْ اسْوِيتْ
مَا جَاوْ مَا سَالُوا ** وَ لاَ بَعْثُوا لِيَا مَرْسُولْ
يَا الوَرْدَة مَالْ اوْرَاقَكْ فِي الغُصَانْ اذْبَالُوا **** اصْفَارْ لُونَكْ مَثْلْ المَقْتُولْ
*ارْمَاوْنِي و رَاحُوا اُو مَا جَاهُمْشْ عَارْ*
انَا اللِّي تَعَبْتْ بَاشْ انْرِيَّحْهُمْ **** اجْرِيتْ وَ اشْقِيتْ فِي خَاطَرْهُمْ
كَانْ فَخْرِي كِي نَخْدَمْهُمْ ** وْ نَسْعَدْهُمْ
اصْعَابْهُمْ يَسْهَالُو **** وَاشْ طَلْبُوا مَنِّي مَقْبُولْ
يَا الوَرْدَة مَالْ اوْرَاقَكْ فِي الغُصَانْ ذْبَالُو **** وَ اصْفَارْ لُونَكْ مَثْلْ المَقْتُولْ
*وَ لَمَّا قَلْ جَهْدِي وَ اسْقَمْ بَدْنِي انْهَار*
قَالُوا امْتَعْبَتْنَا مَنْ غِيرْ اصْلاَحْ **** نَدُّوهَا لَلْمَرْكَزْ تَرْتَاحْ
بَكْرُوا بِيَا ذَاتْ اصْبَاحْ ** بَقُلُوبْ اقْسَاحْ
اُو نَفْذُوا مَا قَالُوا **** وَ انَا انْشُوفْ وْ عَقْلِي مَذْهُولْ
يَا الوَرْدَة مَالْ اوْرَاقَكْ فِي الغُصَانْ اذْبَالُوا **** وَ اصْفَارْ لُونَكْ مَثْلْ المَقْتُولْ
*انْسَاوْ كُلْ مَا عَانِيتْ وْ هُمَا صْغَارْ*
ضَحِّيتْ ابْصَحْتِي مْنَ الخُوفْ عْلِيهُمْ **** انْخَافْ مْنَ النَّسْمَة تَأذِيهُمْ
افْنٍيتْ عُمْرِي فِي خَاطَرْهُمْ ** وْ هُنْتْ علِيهُمْ
كَذْبُوا وَ احْتَالُوا **** اُو سَمْحُوا فِيَا بِلاَ مَعْقُولْ
يَا الوَرْدَة مَالْ اوْرَاقَكْ فِي الغُصَانْ ذْبَالُوا **** وَ اصْفَارْ لُنَكْ مَثْلْ المَقْتُولْ
*كَانَتْ مُنْيَتِي نَفْرَحْ باوْلاَدِي كَبَارْ*
وَ نَرْتَاحْ بَعْدْ تَعْبي فِي اَخَرْ عُمْرِي **** بَافْلاَذْ كَبْدَتِي وَاتْقَرْ ابْصَارِي
وَ ايْعَوْضُولِي امْشَقَتْ صُغْرِي ** يَرْفْعُوا قَدْرِي
خَانُوا وَ اخْذَالوا **** كُلْ مَا اتْمَنِّيتُه مَبْطُولْ
يَا الوَرْدَة مَالْ اوْرَاقَكْ فِي الغُصَانْ اذْبَالُوا**** وَاصْفَارْ لُونَكْ مَثْلْ المَقْتُولْ
من مواضيعي
0 يَا مالكي اعفو
0 تَبْكِي عَلَى ابْكَايَا
0 الحب رحمة
0 اللهُم صَلِّ علَى الحَبِيبْ
0 اللهُم صَلِّ علَى الحَبِيبْ
0 أهْ مَنْ غَدْرْ اللِّي حْسَبْتُه حْبِيبْ
0 تَبْكِي عَلَى ابْكَايَا
0 الحب رحمة
0 اللهُم صَلِّ علَى الحَبِيبْ
0 اللهُم صَلِّ علَى الحَبِيبْ
0 أهْ مَنْ غَدْرْ اللِّي حْسَبْتُه حْبِيبْ
التعديل الأخير تم بواسطة محمد سعيد ريال ; 08-10-2017 الساعة 11:52 PM
