قصيدة .. للشاعر حبيب اسطمبولي.نقلها لكم محمد سعيد ريال
09-03-2016, 06:38 PM


رَانِي مَلَسُوعْ بَالْهَوَى *للشَاعر حبيب اسطمبولي*


رَانِي مَلْسُوعْ بَالْهَوَى شَعْلَتْ نَارْ امْهَاجِي *** نَاوِي جَوْلَة انْزُورْ طَهَ مُولْ المِعْرَاجْ
لِيهْ اخْلاَقِي هَاجُوا *** ابْحُبُه رُوحِي امْبَنْجَة
بَعْدْ الزَّوْرَة ازْدَادْ شُوقِي وَ قْلِيبِي وَاجِي *** وَ احْرَمْ عَنِّي المَنَامْ بَاكِي سَخْفُو لَدْعَاجْ
فَرْحِي وَ الزَّهْوْ اسْمَاجُوا *** بَاقِي وَحْدِي مَهْمُومْ فِي الدُّجَا
لَقْرَاحِي مَا لْقِيتْ نَاجَمْ نَعْرَة لَعْلاَجِي *** حَرْ القُرْحَة وَ لِيعْتِي وَ امْدَامَعْ لْغْنَاجْ
فِي البَحْرْ اسْفُونِي مَاجُوا *** اُو عَصْفَتْ لَرْيَاحْ هَايْجَة
مَا نَهْنَا مَا انْشُوفْ رَاحَة بَالشُّوقْ انْلاَجِي *** وَ اطْغَى بَحْرُه اعْظِيمْ رَانِي مَثْلْ الحَلَّاجْ
خَنْجَرْ فِي حَدْ اوْدَاجِي *** وَ الرُّوحْ اصْفاتْ للَنَّجَا
رَانِي نَلْجَا عَلَى الهَادِي *** تَاجْ الرَّسْلاَ اخْيَارْ زَادِي
مَحَمَّدْ سِيدْ كُلْ سِيدْ
مَنْ حُبُّه غَاسْ فِي اكْبَادِي *** نُورُه اثْمِيدْ فِي اثْمَادِي
الْمُزَمَّلْ عَاتـْقْ العَبِيدْ
يَا دْرَاشْ انْعُودْ يَا اسْيَادِي *** انْفَارَقْ اهْلِي مْعَ اوْلاَدِي
فِي طِيبَا انْبَرَّدْ الصَّهِيدْ
طِيبَا يَا طِيبَا تْخِيلْ فاجِي عَنْ قَلْبِي فَاجِي*** يا رَاحَةْ لَعْقُولْ طِيبَا زِينَكْ خَلَّاجْ
كَوْكَبْ فِي سَعْدْ ابْراجُو *** نَارَكْ فِي الجُوفْ لاَعْجَة
طِيبَا مِنَ الطِّيبْ فَاحْ عِطْرَكْ هَيَّجْ امْوَاجِي*** مَا ابْقَى فِي بَحْرْ مَنْ ايْعَانَدْ تَرْقُصْ امْوَاجْ
وَ النَاكَرْ فِي تَخْلاَجُو *** وَ الأُمَّارَة بِيهْ مَيْجَا
بِينْ المَنْبَرْ وَ القَبَرْ رَوْضَة تَسْطَعْ وَهَّاجِي *** لَرْوَاحْ الطَّاهْرَة اتْنَاجِي صَاحِبُ التَاجْ
تَأخُذْ مَنْ نُورْ اسْرَاجُو *** تَنْسَجْ فِي حُلَّة امْدَبْجَا
رَانِي مَلْسُوعْ بَالهَوَى شَعْلَتْ نارْ امْهَاجِي *** نَاوِي جُولَة انْزُورْ طَهَ مُولْ المِعْراجْ
لِيهْ اخْلاَقِي هَاجُوا *** ابْحُبُو رُحِي امْبَنْجَة
يَا هَلْ تَرَى انْعُودْ نَغْرَفْ *** مَنْ كَاسْ ارْحِيقْ لِيسْ يُوصَفْ
نَرْوَى وَ انْقُولْ مَا اكْفَى
بَكْفُوفِي مَنْ مَعِينْ يَوكَفْ *** بَارَدْ صَافِي لَذِيذْ نَرْشَفْ
نَسْقِي نَفْسِي اللاَّهْفَة
يَهْدَنْ فُؤَادْ كَانْ يَرجَفْ *** مِنَ الأمَّارَة احْزِينْ خَايَفْ
دِيمَا عَلَى الغِيْ لاَهْفَة
يَطْفَى اوْهِيجْ الظَّمَا وَ ايْعُودْ جْنَانِي سَاجِي *** وَ انْوَاوَرْ بَمْسُوكْ عَاطْرَة وَالهَوَى رَجْرَاجْ
وَ السَّرْ اللِّي مَحْتَاجُو *** يَأتِينِي مَنْ بَعْدْ الرَّجَا
يَا الْهَادِي طَهَ اعْنَايْتَكْ نَادِي لَخْدِيمَكْ أَجِي *** لَلْقُبَّة الخَضْرَة الطَّاهْرَة خُوذْ اللِّي تَحْتَاجْ
نَجْبَرْ لَلْقَلْبْ اعْلَاجُه *** بِيكْ المُولَى ضَامَنْ النَّجَا
بأمُّ القُورَى البَاهِيَة انْضَمَّدْ القَلْبْ الوَاجِي *** انْتَمَّمْ لَرْكَانْ مَا انْخَلَّي رُكْنً يَعْوَاجْ
جَبَلْ الرَّحْمَة وَ افْجَاجُه*** يَجْلَبْنِي مَنْ كُلْ فأيْجَة
انْشُوفْ طْيُورْ السَّرْ حَوْمُو *** عَلَى عَرافَة اتْلاَيْمُوا
ثَمْ انْقُولْ بْلَغْتْ المَرَامْ
اصْفُوفْ الهِيبَا اتْنَظْمُوا *** فُوقْ الخَدْ ادْمُوعْ يَرْشَمُوا
رَفْعُوا اكْفُوفْ الذَّلْ بَالتَّمَامْ
شُورْ مِينَى لَرْكَابْ بَرْمُوا *** فِي ابْلِيسْ اللَّعِينْ يَرْجَمُوا
وَ انْزَلْنَا لَرْفِيعْتْ المَقَامْ
طَوَافْ الإفَاضَا الزَّايَدْ شُوقِي وَ اهْيَاجِي *** الأسْعَدْ انْقَبْلُو بَرْوَامَقْ لَدْعَاجْ
المَرْوَى نَقْصَدْ مْنْهَاجُه *** تَسْكُنْ رُوحِي اللَّاعْجَة
عَنْدْ الصَّافَى انْمَدْ كَفِّي وَ الفَضْلْ انْرَاجِي *** وَ انَّالْ مِنَ الكَرِيمْ سَرْ لْقَلْبِي و اعْلاَجْ
كَاسِي نَجْبَرْ امْزَاجُه *** بَمْزِيجْ كْيُوسِي امْحَرْجَة
بِيرْ إسْمَعِيلْ فِيهْ عُنْصَرْ مَنْ نَبْعْ اغْنَاجِي *** زَمْزَمْ فِيهَا امْعِينْ صَافِي منْ دُونْ امْشَاجْ
الظَّامِي تَبْرَدْ امْهَاجُه *** وَ انْوَادَعْهَا غَايْتْ الرّْجَا
راَنِي مَلْسُوعْ بَالهْوَى شَعْلَتْ نَارْ امْهَاجِي *** نَاوِي جَوْلَة انْزُورْ طَهَ مُولْ المِعْرَاجْ
لِيهْ اخْلاَقِي هَاجُوا *** بْحُبُه رُوحِي امْبَنْجَة
نَرْجَعْ لَهْلِي بْلَا ذْنُوبِي *** مْرَايَةْ قَلْبِي بْلَا عْيُوبِي
الأمَّارَة اضْحَاتْ تَايْبَة
أمْسَحْتْ صْدَاهَا وْقُلْتْ تُوبِي *** مَاذَا حَمْلَتْ مَنْ كْرُوبِي
وَ اكْيُوسْ الغِيْ شَارْبَة
نَحْمَدْ رَبِّي اغْسَلْتْ ثُوبِي *** أدِّيتْ الفَرْضْ وَ الوُجُوبِي
عُدْتْ ابْنَفْسِي امْهَذْبَة
صَلَّى الله عْلِيكْ يا الهَادِي يَا نُورْ سْرَاجِي *** وَ عَلَى ألِيكْ كَافَّة ابْدُورْ ظْلاَمْ الدَّاجْ
كْوَاكَبْ وَ انْجُومْ ابْلاَجُوا *** وَ اشْمُوسْ الضُّحَى البَاهْجَة
بَيكْ انَا اخْتَمْتْ مَنْسُوجِي اسْبَكْتْ ادْبَاجِي *** أسْطَمْبُولِي عَلى الرّضَا بَقْيَامَكْ نَسَّاجْ
حُبَّكْ زَايَدْ تَهْيَاجُه *** وَ مْنَ المُولَى طَالبْ الرَّجَا
نَفْخُرْ بِيهَا عْلَى احْبَابِي وَ اهْلِي وَ انْتَاجِي *** حُلَّة مَكْمُلَة وَ بَاهِيَة مَا اكْسَبْهَا لَجْلاَجْ
سْيُوفْ احْسُودِي يعْوَاجُوا *** و الفَارَسْ يظْهَرْ يَومْ الهْجَا
رَانِي مَلْسُوعْ بالهَوَى شَعْلَتْ نَارْ امْهَاجِي *** نَاوِي جَوْلَة انْزُورْ طَهَ مُولْ المِعْرَاجْ
لِيهْ اخْلاَقِي هَاجُوا *** ابْحُبُّه رًوحِي امْبَنْجَة .


تَمت بالتوفيق من الله
مواضيع العضو مشاركات العضو
من مواضيعي 0 يَا مالكي اعفو
0 تَبْكِي عَلَى ابْكَايَا
0 الحب رحمة
0 اللهُم صَلِّ علَى الحَبِيبْ
0 اللهُم صَلِّ علَى الحَبِيبْ
0 أهْ مَنْ غَدْرْ اللِّي حْسَبْتُه حْبِيبْ
التعديل الأخير تم بواسطة محمد سعيد ريال ; 12-03-2016 الساعة 02:13 PM