قُولُوا لِمَنْ جَاء يَتْكُولَفْ
27-10-2015, 08:51 PM
قَصِيدْ مِنْ نَظْمِي..
قُولُوا لِمَنْ جَاء يَتْكُولَفْ
قُولُوا لِمَنْ جَاء يتْكُولَفْ فَمُه يْلَجْمُه ** وَ يْشَدْ لْسَانُو يْلَايْمُه ** هَذَا البَحْرْ صْعِيبْ لَازْمُه عُوَامْ
وَانْتَ صْغِيرْ غُرِّي عْظِمَاتَكْ مَا يْقَاوْمُو ** المُوجْ العَاتِي مَا تْنَجْمُو ** يَتْهَرَّسْ شَقْفَكَ يْصِيرْحْطَامْ
فِي مْجَالْسْ الْكْبَارْ امْثَالَكْ عِيبْ يَتْكَلْمُوا ** مَا لْهُمْ دِرَايَة مَا تْعَلْمُوا ** مَا فَهْمُوا مَعْنَة وْلاَ صَرْفْ كْلاَمْ
وْ سَبْقُوا لَلْمِدَان زَدْمُوا تْقَدْمُوا ** كَانْ مِنَ الوَاجَبْ يَحّشْمُوا ** مْوَاضَعْهُمْ فِي الخَلْفْ جَاوْ لَلْأمَامْ
وَ بْدَاوْ بَالْقْبَاحَة فِي خَلْقْ الله يَشَّتْمُوا ** مَا حَسْبُوشْ لَنْهَارْ يَنْدَمُوا ** وْيَحَّصْلُوا في وَقْتْ مَا يْفِيدْ نْدَامْ
يا تَالْفْ العَقَلْ دِيرْلْفُمَكْ كْمَامْ كَمَّمُو** بَشْكِمَةْ حْدِيدْ شَكْمُه ** رَاهِي الغَتْبَة فِي قْفَا الغِيرْ حْرَامْ
الجَهْلِينْ مَثْلكْ كِي يْحَبُّو يَتْكَلْمُو ** يَسْتَأذَنْ مَنْ اللِّي يْعَلْمُو ** و إذَا قَالُّهْ اصْمُتْ يْقُولْ نْعَامْ ** حْسَبْتْهَا سَابَتْ تْقَابَحْ سيدَكْ وَ تْلُوْمُه ** وَتَطْعَنْ في كْلاَمْ نَضّْمُه ** بْلاَ أدَبْ لاَ ترْبِيَة و لاَ نِضَامْ
غُرِّي جَاء يْعَانَدْ نُورِيلُه وَاشْ يَلْزَمُه ** نَطْلَقْ سْهَامِي نْعَدْمُه ** في يَدّو كَلْخَة حْسَبْ شَدْ حْسَامْ
ذَالقُومْ لَلْبْلَا يَسبْقُو بْلاَ مَا يخَمَّمُو ** مَا يَعَيَاوْ وَ لاَ يْسَلْمُو ** هَذِي عَدَتْهُمْ عَنْ سَايَرْ لِيَامْ
هَذِي طْبَاعْهُمْ وَرْثُهَا وْ هَاكْذَا تْعْلْمُو ** مَا يَسَّكْتو مَا تْبَكْمُو ** كَأنَّهُمْ اوْجَاقْ شَادِّيِنْ عْظَامْ
يَا تَالْفْ العْقلْ دِيرْ كْمَامْ لْفُمَّكْ كَمَّمُو ** بَشْكِيمَةْ حْدِيدْ شَكْمُو ** رَاهِي الغَتْبَة في قْفا الغِيرْ حْرَامْ
قَاعْدِينْ لَلْخْصَرَة يَسْتَلَذُو كِي يْهدْمُو ** أشْرَارْ الخَلْقْ إذا تْلاَيْمُو** مَنْ غِيرْ االغَتْبَة مَا لْهُمْشْ كْلاَمْ
البُغْضْ وَالحْسَدْ سَكَنْهُمْ يَبْغُو يْحَطْمُو ** كُلْ مَنْ اعْطَاهْ الله ولَهْمُو ** يَسّبْقُو لَلْعِيبْ غَاوْيِينْ خْصَامْ
يْعَطْلُو فِي لَعْبَادْ مَا رَحْمُو مَا اَرْتَاحْمُو ** دَايْرٍينْهَا حَرْفَة ايْناَقْمُو ** مَا يَعَّتْقُو كْبِيرْ وَلاَ صْغِيرْ غْلاَمْ
نَصّْبُو انْفُوسْهُمْ عُلَمَاء بْلاَ مَا تْعَلْمو ** وْ حَسْبُو الأشْيَاخْ سَلْمُو** مَغْرُورِينْ وْعَايْشِينْ فِي الأوْهَامْ
غَابُو الطُّيُورْ خَرْجُو افْرَاخْ البُومَة يْحَوْمُو** الأرْنَبْ شَمَّرْعْلَى كْمَايْمُو** جَاء لْبَابْ العَرِينْ يْبَارْزْالذُّرْغامْ
يَا تَالْفْ العْقَلْ دِيرْ لْفُمَكْ كْمَامْ كُمَّمُو ** بَشْكِيمَةْ حْدِيدْ شَكَّمُو **رَاهِي الغَتْبَة فِي قْفَا الغِيرْحْرَامْ
انْهِيتْ مَا نْظَمْتْ بَالحَمْدُ لِلَّهْ نَخْتْمُو ** مَا عْبَقْ وَرْدْ مَعَ نْسَايْمُو** صَلآوَاتْ عَلَىى الشَّفِيعْ فِي الأنَامْ
وَسْلاَمِي لَلْأشْيَاخْ اللِّي مازَالْ يَنْظْمُو ** واللِّي مَاتْ الله يَرْحَمُو ** وَالْحَاسَدْ فِي عِينِيهْ خَمْسْ سْهَامْ
مَذْمُومْ مَالُو قِيمَة عَنْدِي مَا نْفَخمُو ** مَسْخُو مُلاَنَا وْ قَزْمُو ** مَا يَسْوَى قِيمَةْ نَعْلْ فِي لَقْدَامْ
قْرَا حْرُوفْ الأبَجَدْ أسْمِي تَطَرْجْمُو ** خَللِّي اعْدَايَا يَتْأَلْمُو ** مِيتِينْ وَالعَشْرة وألِيفْ وْلاَمْ
عَامْ ألِيفْ و دَالْ و جِيمْ نْرَصّْمُو ** وَ الوَاوْ بِيهْ ظَهْرُو عْلاَيْمُو ** شَهْرْ ذِي االحِجَّة فِي ثَالَثْ لِياَمْ
يَا تَالْفْ العَقَلْ دِيرْ لْفُمَكْ كْمَامْ كُمَّمُو ** بَشْكِيمَةْ حْدِيدْ شَكْمُو ** رَهِي الغَتْبَة فِي قْفَا الغِيرْحْرَامْ


تمت بعون الله ..محمد ريال..
مواضيع العضو مشاركات العضو
من مواضيعي 0 يَا مالكي اعفو
0 تَبْكِي عَلَى ابْكَايَا
0 الحب رحمة
0 اللهُم صَلِّ علَى الحَبِيبْ
0 اللهُم صَلِّ علَى الحَبِيبْ
0 أهْ مَنْ غَدْرْ اللِّي حْسَبْتُه حْبِيبْ
التعديل الأخير تم بواسطة محمد سعيد ريال ; 20-11-2015 الساعة 10:59 AM