تسجيل الدخول

أهلا اوسهلا بزوارنا وأعضائنا الكرام



و أهلا برواد الشعر لشعبي







قصيدة من عند خوكم عبد السلام











تحت عنوان







بين عقلي و قلبي











يا عمري نقدر نصبر عليك ما نقدر نصبر على فراقك



طول الليل نخمم فيك نتفكر أيامات الفرح بين احضانك



يا عبدو واش من نوم يجيك كي ذيك الجافية غلقت بابك



هبلات بالخزرة هاذيك تقول عليها جن سكن في راسك



من غيرها شكون يهنيك ولا يرجع الفرح في قلبك



الزمان و الدنيا لعبو بيك هاذو هوما سباب عذابك



رجعت وحيد بلا شريك الدمعة زادت قهرت عيانك



حتى الحبيب اللي قريب ليك قالك درتها بيدك حلها بسنانك



اليوم ماكان ما ندير بيك ما نوقف معاك ما يغيضني حالك



الدنيا مع الواقف الله يهديك شحال نعيا أنا نفهمهالك



نهار تبرا و توقف على رجليك قاع الناس يسمعو لأقوالك



يقولو يا السي عبدو مرحبا بيك وسط ناسك و جيرانك



يا عبدو إذا تسمعلي نوصيك شي وصايات ديرهم في بالك



محال تبدل الزهو باللي يبغيك ترجع أنت الظالم و يزيد هبالك



الدنيا يوم تفرحك و يوم تبكيك نهار تزهيك ونهار يتلف حسابك



و العبد الغدار محال يساميك و عندك تروح تحكيلو أسرارك



و بالاك تأمن العبد اللي معاديك كي يجي يقولك أنا من أحبابك



و تالف الراي عندك يدبر عليك قولو دبارتك خليها عندك



أرضى بالمكتوب اللي يجيك و عندك تجهل الرب اللي خلقك



بالاك تفدي اللي يجفيك أرميه في الثقيل يتسقم حالك



يدور الزمان ويرجع ليك ندمان و يحوس على خيالك



عشق الريام محال يداويك مادام فيه الغدر و أنت علابالك



وين راه الحبيب اللي يفديك و يشاركك أحزانك و أفراحك



غير اللي بالعذاب يبليك وثاني يزيد يعمقلك جراحك



و يروح لعديان حياتك يوريك باش يفرحو بواش صرالك



نكار الملح منو غير أخطيك وما تزيد تذوقو من طعامك



قولي من الذيب واش يجيك من غير الغدر و المهالك



حكيتلي حكايتك و سمعت ليك بقيت محير على واش جرالك



ندعي الله يقدرك و ينسيك و بقدرة ربي يتبدل زمانك



اللي حب يبيعك و يشريك ماهي الدنيا ماهم عديانك



جارتك اللي عزيزة عليك مع أحبابها اللي هوما صحابك



في وجهك تقولك نرضيك و في غيابك والله ماراك سالك



خسرتلك حياتك و بكات عينيك و ربحاتك العيب مع أولاد بلادك



أخطي العبد اللي يعييك و في كل عشرة لازم تخدم عقلك



أشكي لربي هو اللي ينجيك و يبدل قاع أحزانك بأفراحك



و الحبيب اللي حب يرميك بما خير منو ربي يرزقك



أربح طاعتك والديك و ما تعصيهم طول حياتك



و من دعاوي الشر ننهيك ينسوك و يلهوك على دينك



يا عبدو أنا نروح و نخليك مع كلامي ديرو في كتابك



هذا كلام يفرحك و يزهيك إذا سمعتوا و طبقتو في شغالك



تعود فرحان هنا و لهيك تحمد ربي و تقول الله يبارك



أنا عقلك اللي نقريك و القصيدة كتبتها و نظمتها يدك







بقلمي الحزين



عدو الريام

عبد السلام عثماني