تسجيل الدخول

النخوة

وَيـنْ النَخْوَة نَاسْهَا عَـنَّا صــــــــــدُّو... وَقتْ الرُجْلَة اسْحَابْهَا فَاتْ وْ عَـــــدَّا
راحْ الصَّحْ وْ مَا ابْقَى فِيهْ انْعَـــــــدُّو ... غَابْ الْحَقْ وْ طَالْ نَومُو في الرَﭬـدَه
غَابْ الطَّيرْ مْعَ اسْبَعْ لاَ مَنْ شَــــدُّو ... وْغَابْ الرَّاجَلْ مَا ابْقَى فِيهْ الْهَــــدَّه
مُولْ الْخَيمَة مَاتْ دَفْنُوهْ ابْجَلْــــــدُو ... مُولْ العشَّة صَالْ فِيهَـــــــــا لاَ رَدَّه
اشْيَانْ الْوَقتْ امْعَ الدَنْيَا وَ اتْـﭭـــــدُّو ... و اتْرَكّبْ عَنَّا الجْاَهَلْ وَ اتْعَـــــــــــدَّا
مُولْ النَّيفْ ضْحَى مْجَمَّعْ غَيْ وَحْدُو ... وْ مَكْثَرْهُمْ بَاعُوهْ في سُوقْ الَــرَدَّا
الْكَلْمَة بَارُودْهَا نَادِي صَهْـــــــــــدُو ... امْعَمَّرْ قُرْطَاسْهَا غَيْ بَالثَمْـــــــــدَا
إذَا رَيَّــــــمْ حَشْمَكْ يَعْـرَﭪ خَــــدُّو ... وِيذَا مَتَّنْ حَبْ بَارَدْ مَنْ جَلْــــــــــدَة
الْكَذَّابْ إذَا اصْحَـــــــبْ يَلْـﭭـى نَــدُّو ... مَكْثَرْهُمْ فِي وَقْتْنَا عَادُو هَـــــــدَّه
امْـﭭـبَّلْ وِيقُولْ للظَهْـــــرَة نُغْــــدُو ... مَا تَعْرَفْلُو رِيحْ بَايَنْ لاَ مَبْـــــــــــــدَه
إذَا ﭬـرَّبْ لَيكْ جَيْبَكْ غَيْ شَـــــــدُّو ... وَاعْمَلْ حذْرَكْ فِي أكْلاَمُو لَبَـــــــــدَّا
يَحْكِيلَكْ وَشْ كَانْ يَشْفَى عَنْ جَـدُّو ... وَ اخْصَايَلْ وَ ابْطَالْهُمْ وَقتْ الشَــــدَّا
وِينَوَّمْ بَاكْلاَمْ مَاهُـــوشِي ﭬـــــــدُّو ... عَسلْ الشَهْدَة لاَ اكَثَرْ قَلْبَكْ يَـــرْدَى
بالْخَرِيطَـة دَارْلَكْ كَاغَـــطْ مَــــــــدُّو ... مَلْعُوبُو بَادْوَارْ نَاظَرْ في الْـﭭــــــــدَّا
هَذَا هُـوَا صَاحْبُو بَــــــــــــاشْ يْوَدُّو ... يَحْفَرْلُو وِيذَا اغْرَقْ بِيهْ اتْغَـــــــــدَّى
الشَكَّامَــــة وَقتْهُـمْ رَاهُـمْ هَـــــدو ... رَاهُمْ كَثْرُو مَا اتْلَحَّـﭫ لَلْعَـــــــــــدَّا
اجْبَدْ يَا حَجَّاجْ سَيفَكْ مَنْ غَمْـــدُو ... وَالدَنْيَا وَلاتْهُمْ دَارُو عُـــــــــــــــدَّه
الْمَيلاَقْ اليُومْ مَا تُخْــــرُجْ ضَــــــدُّو ... يَتْغَلَّبْ اعْلِيكْ وَ اتْعَشِي غُـــــــــدَّة
يَعْـﭭـبْ بَتْخَنْزِيرْ فَايَتْ عَنْ حَـــــــدُّو ... وِيذَا تَغْلَطْ رَاكْ تَغْرَقْ للزَنْــــــــــــدَا
وَحْدَكْ فِي الْمَيدَانْ سَاعَاتَكْ ﭬـــدُّو ... هاَذِي سَاعَة مَا اطَوَّلْ فِي الْمُــدَّة
اللِّي دَارْ الشَّـرْ يَسْتَنَّى سَعْــــــدُو ... وَ الْحِسَابْ اصْعِيبْ غَيمُو لاَ سَــدَّى
عَبْدَالْوَاحَدْ قَالْ كَلْمَاتُـو شَهْــــــــدُو ... حَبْرُو مَنْ مِيدَادْ أكْحَلْ لاَ جَحْــــــدَه
الْخَوَّافْ إيخَافْ مَنْ وَاحَدْ وَحْــــــدُو ... واللِّي خَايَفْ خَافْ مَنْ نَارُو يَهْـــدَى

الشاعر : علي عبدالواحد حرزالله

ماتت قلوب الناس ماتت فيها النخوة

جميل ما خطت يداك

الله يبارك يا شاعرنا الكبير نريد المزيد من اطباقك

فعلا اختي الكريمة الا من رحم ربك
اسعدني مرورك الجميل اختي ليلي ناس

الله يبارك فيك ام زيزو ما يكون غير خاطرك