من سيربح الصندوق؟
03-03-2014, 03:01 PM
من سيربح الصندوق؟
32/13/2024
السؤال الاخير و المهم من اللعبة هو كتالي
من الذي كان رئيس الجزائر و فاز في انتخابات افريل 2014 منذ عشر سنوات ؟
الاختيارالاول : بوتفليقة//.......... //الاختيار الثاني : لويزة حنون
الاختيار الثالث: لم تجرى انتخابات في 2014 // .............// الاختيار الرابع :بن فليـــــــس
اقتباس:
|
للتذكير مسابقة من يربح الصندوق مفتوحة لجميع المواطنين البالغين و المسجلين في القوائم . |
المواطن الاول "من دارو ما يخرج" : سمحولي ما نقدرش نجي ....
منشط الهردة : لا عليك سنجيب نحن مكانك و مكان كل من يغيب... و المستقبل سيصنع بكم او بدونكم(نبكي عليك زعما)
المواطن الثاني "ديما يخرج ..60 سنة و هو يخرج " : أنا ما نيش شافي بصح الشي اللي شفيت عليه بزاف ما بين هادو هو بوتفليقة و بومدين ايه كون نحكيلكم يام الساليغان و اللاندوشين .....
منشط الهردة : شكرا شكرا ايها الشيخ الكريم و الله ايطول في عمرك (بلاك نستحقوك في عهدة اخرى)
المواطن الثالث : " ديما غايب" : 4 سنين و انا غايب ماني حافظ والو و الاجابة في 30 ثانية صعيب بزاف و انا ضعيف فالتاريخ سيرتو .
العد التنازلي : 25 ثا....15ُثا ..10 ثا ...5ثا
منشط الهردة : بصوت خافت : تقدر تغش... تقدر تغش (جنيراسيو تاع الغش، تعرفوا غير العتبة)
00ثا طم طم انتهى الوقت للاسف الشديد انت تعتبر ورقة بيضاء .نرجوا الا تغيب 4 سنوات اخرى ، قالو في قلبو (كون غير ماتزيدش تجي )
المواطن الرابع (فايق زعمة ):باينة السؤال فيه فخ ، لم تجرى طبعا و الدليل ان و لا واحد من هؤلاء يحكمنا اليوم(2024)...
منشط الهردة : سنعتبر اجابتك مشطوبة و اخطيك من السياسة نصيحة من عندي ياخي عباد
المواطن الخامس : كان بن فليس الخارق و كان فوزا ادخل البلد التاريخ رغم الاعادي و الايادي الغادرة اذا لم تخني الذاكرة
منشط الهردة : حتى و لو كنت صح و التاريخ صح نزوروه نزوروك و روح خف و ماذا بيك تجاوب قد السؤال و بس
المواطن السادس: "جابوه دراع": قبل حتى ما يسمع السؤال صاح عاليا بوتفليقة بوتفليقة ... عهدة رابعة عهدة رابعة.
منشط الهردة : احسنت احسنت و ما تنساش الزردة من بعد و لا نقولك فالكار نعطوكم كاسكروط كاسكروط
المواطن السابع : " مرشح مشاكس " انا احتج عن السؤال، اين اسمي بين هؤلاء ؟ و عليه: لا انا و لا اتباعي سيجيبون !!!!
منشط الهردة : انت ممنوع دستوريا و اتساءل كيف سمحوا لك الدخول للاستوديو اصلا ...
المواطن الثامن : " و عقدنا العزم ان تحيا الجزائر" جبهة التحرير اعطيناك عهدا طرم طرم طرم
منشط الهردة : هكذا هم ابناء الجزائر البررة واقفون واقفون نكثرولكم الزلابية في رمضان ان شاء الله..........
المواطن التاسع " خطونا يا الدولة خطونا " اخطووووونا
منشط الهردة : شبيبة ضايعة و ايقولك تسليم المشعل ياخي حالة ، راهو زاطل جاوبو في بلاصتو بلا ما نوصي
المواطن العاشر : "المقاول مول الدشرة" : لحم كتافي منو، انه رجل المصالحة و المسامحة رجل كُوول ووَكََّلْ والاجابة راك عرفها
منشط الهردة: ربي ايزيد الخير و 5 في عين الحساد و كاش ما ستحقيت مازلنا هنا "بنوكنا ديما مفتوحة"
الدا الحادي عشر : جامي جامي و مانشاركوش و شكون قالك اصلا ادخل هنا ، لا نريد ان تطرحو علينا اسئلتكم هذه ، نحن لا نعترف بتاريخكم المزور منذ الثورة .
منشط الهردة : on se calme يا اصدقاء المنطقة صعيبة فلا تتعاملوا معهم بالعنف ، على كل هذا لن يؤثر و المقاطعة حق مشرووع و مكفول للمواطنين . اذا خرجنا هنا ب5 بالمية قاع رانا ملاح
الثاني عشر : "من خاف سلم و الموالفة خير من التالفة" : ما صبناش كيفو و مشفناش غير هو و نشوفو غير اليتيمة وزادونا النهار ما نقراوش الجرنان و خاطينا البوليتيك و البوليتيك غير ايعييك و اللي كان رئيسنا داك الوقت كان بوتفليقة و و اللي فيه الخير ايجيبو ربي والله يهدينا و يهديك
منشط الهردة : ها الهردة عفوا ها الهدرة ، ها الشعب ,,,,,,
في جهة المواطنات
مواطنة واحد : نقولك و كلي فخر بوتفليقة يقلع الضيقة و يا و كنت من الثقبة تاع الباب ما نقدرش نشوف و اليوم حمدووووووووو الله ، راجلي ولى في يدي كي .... الخلع و الكوطة و لا ليبرتي و حتى الحفافات فالبرلمان و كي نتفكر 8 مارس و شاب يزيد نبكي على دوك ليام و احتج فقط على الفصل بيننا و بين الرجال هنا فالاستوديو و هذا خرق لدستور جمهوريتنا
منشط الهردة :تصفيقة على المرأة الجزائرية و كل هذا بفضل نضالكم الطويل و بوتفليقة و طلبكم على رؤوسنا
مواطنة 2 :" امراة شجاعة" لا لا راك غالط و راكي غالطة و ماشي قاع الخضرة حشيش و كلمة نضال كبيرة عليكم واحنا لي قهرنا اسياد اسيادكم و حنا لي خليناك انت و هي احرار بعدما كنتم حفيانين عريانين و احنا لي كلاو من لحمنا باش ما ياكلوش من لحمكم .... يا خسارة كلمة جزائرية فيك وفيه
منشط الهردة: حط راسو و عرف قدرو و عرف حقيقتو و شعال يسوى و تمنى لرض تنشق و تبلعو لكن وجهو ممسوح من زمان و قال شدة و تزول و قال au suivant
مواطنة مهاجرة : pardon j'étais absente il y a une quinzaine d'années
منشط الهردة : لديكي نقاط مساعدة من بينها الاتصال بشخص ما يساعدك
المهاجرة: ساتصل بالزوج في باريس
الزوج على الهاتف من باريس : و ياو خطوني نسيتكم ديجا علاش تفكروني بالبلاد
منشط الهردة : للاسف الشديد اجابتك ملغاة و ورقتك بيضاء و باينة زوجك كان حراق
المواطنة المهاجرة : لا لا هو جراح كبير في مستشفى فال دو غراس
منشط الهردة : جزايري !!و جراح كبير في فال دو غراس!!! غريب جدا!!! المهم احنا وصلنا ليه قبلو
.gif "8")
مواطنة ثالثة : ما كان لا عدس لا لوبيا ما عندي ما ندير للعشا اليوم بلاك من بعد ايجبوه و ما راحش نشارك هاد المرة و ساشارك في الحلقة القادمة ان شاء الله على مول اللوبيا و العدس
منشط الهردة : قلنالكم جاوبو قد السؤال و في السوق ما كانش غير هادو كاين الحمص كاين البرقوق و الطعام "الكسكس" و البطاطا فيها فيها و هي الرقم واحد و اذا قفرت البطاطا نجيبولكم اللوبيا ... و علاه جيتي اصلا. " ورقة بيضاء" آلي ديقــــ...ا..ج
مواطنة رابعة و اخيرة : بحرت لها وطالبت بحذف الاجابتين
فلم يبقى من الاجابات الا بوتفليقة //,,,,,// و لم تجرى انتخابات بالنسبة للشعب
زادت بحرت لها تاني
منشط الهردة : عندك جوكير اخر هو راي الجمهور
بوتفليقة 20 بالمية //,,,,,,,,// لم تجري انتخابات 80 بالمية
منشط الهردة : ركزي جيدا راي الجمهور شيء و الاجابة الرسمية شيء آخر و ساساعدك لانك الاخيرة: هو اسمهه يبدأ بالباء و فيه القاف و اسمه الاخر عبد العزيز
المواطنة الرابعة : بوتفليقة اذن اليس كذلك ؟؟
منشط الهردة : شكرا لك و لا يحق لي الحديث عن ذلك قبل الفرز و مصادقة المجلس الدستوري نحن على الهوا
و العالم يشاهدنا ( ودي عايزة كلام)
مواطن فوق العادي : طوارئ ، سيارات سوداء ، الاستوديو محاصر ، الصحافة اكثر من الجمهور ، المنشط يرتعد من الخوف و كله ترحاب : مرحبا بسيدنا مرحبا ، مرحبا كذلك بسيدنا الصغير ( oh كي راك شباب ، صدق من قال ذاك الشبل من ذاك الاسد)، المنشطات (الموظيفات) كلهم ابتسامات و اقفين في استعداد
المواطن فوق العادي يبتسم في وجه الكاميرات ينظر الا السيد الصغير كي يجيب مكانه كيما العادة
منشط الهردة : تفضل تفضل خوض وقتك ، اشرب حاجة و انتا تجاوب .....
100ثا ......200ثا....300ثا العداد اصبح بقدرة قادر تصاعدي !!!!
Papa السؤال هادا شايفو بصح انسيت الاجابة
السيد الكبير: احم احم السؤال هدا انا درتو و انا ارسلتولكم للحصة من قبل و الاكيد الولد كان صبيا ايامها و انسا الاجابة ، اه يا وليدو كيفاش نسيت عموووو و الاجابة انا درتها و هاد الجمهور و الكومبيوتر لازم تغيروهم لانو النتائج كانت
المصوتون 68 بالمية و 5 منها ملغاة //و الغائبون 32 بالمية
من المصوتين : 78 بالمية بوتفليقة ///15 بالمية بيضاء //// 6بالمية بن فليس /// 1 بالمية لويزة
السيد الصغير : آآah تفكرت ! انه عمو و العهدة الرابعة
منشط الهردة : و الاجابة صحيحة يا لها من عبقرية ، انه عمو و العهدة الرابعة و انتظروا سؤال الحصة القادمة :
من الرئيس الذي خلف بوتفليقة (نقطة انتهى)بعد عهدته الرابعة ؟
قبل ذلك نعلن المواطن فوق العاديو ابنه و حاشيته و فريقه فائزا بالصندوق و شكرا لكم ومتنساوش مع العهدة ديما الزردة ....
ويل لأمة تكثر فيها المذاهب و الطوائف و تخلو من الدين ..و ويل لأمة تحسب المستبد بطلا و ترى الفاتح المذل رحيما ويل لأمة لا ترفع صوتها الا اذا مشت بجنازة و لا تفخر الا بالخراب ، و لا تثور الا وعنقها بين السيف و النطع ،ويل لأمة ســائسها ثعــلب و فيلسوفها مشعـوذ و فنها فن الترقيع و التقليد ويل لأمة تستقبل حاكمها بالتطبيــل و تودعه بالصفيـر لتستقبل اخر بالتطبيل
من مواضيعي
0 بضاعتكم ردت اليكم .... عن النفاق العربي (عبد الباري عطوان)
0 فريد بجاوي سرق من الجزائر أكثر من 2 مليار دولار!
0 من هو المتسبب في قربعة قربوعة للمقربعين ؟؟
0 قطر تدعم السيسي و تعود للحضن المصري !!!!!
0 وزير سابق يكشف دعم إسرائيل للمغرب... وقصة تجنيد بولارد
0 الاعتراف المتوالي بدولة فلسطين لماذا الآن؟
0 فريد بجاوي سرق من الجزائر أكثر من 2 مليار دولار!
0 من هو المتسبب في قربعة قربوعة للمقربعين ؟؟
0 قطر تدعم السيسي و تعود للحضن المصري !!!!!
0 وزير سابق يكشف دعم إسرائيل للمغرب... وقصة تجنيد بولارد
0 الاعتراف المتوالي بدولة فلسطين لماذا الآن؟
.gif "9")
