تسجيل الدخول

لو كان المال رجلا لتزوّجته كلّ النساء...
لوكان جاء المال راجل
راهي تزوجاتو كول مرا
هذا لكلام واقع و حاصل
و ما راهوش غير فكرة
راني نشوف الصّح و مارانيش نتخايل
و هاد لكلام قلتو شحال من خطرة
الدّنيا عندها مال و ذهب و خلاخل
تحواس و خرجات و معيشة بّرّا
تحب الراجل لمرفّه و العاقل
ألي يكون ليها سند و سترة
تتجمّع فيه كامل لخصايل
عز و مال و جاه و شهرة
و كاين ألي تقولّك معليش مرفّه و عادل
هادا إذا كان متزوّج شحال من مرّة..
لمهم مالو مليح و هايل
و زواجو حلالي ماشي غدرة
و كاين ألّي تقولك معليش شيخ و مالو طايل
يموت و نورث موراه الجرّة
نعاود نبني حياتي بسّاهل
و أنّاحي على روحي لبق و لغبرة
و كاين ألّي تقولّك ندّيه زوالي سروالو حايل
يبيع الحوت و لّا الخضرة
لمهم ننستر و البركة في لقلايل
و يكون خاطيه الزطلة و السكرة
و كي تلحق لعندو يبانو لفعايل
و تتبدّل كامل ديك الهدرة
تبدى تشكي و دمعها يتسايل
أنا كرهت و ملّيت هاد لمعيشة لمرّا
روح تزيد تخدم يا راجل
باش تقدر تعيّشني كي لعدرا
ولّيت نحشم نشوف و نقابل
النسا لّي نعرفهم برّا
لازم نوريلهم كامل
بلّي أنا تان نلبس ألبسة لماركة و لحرّة
و هو مسكين يساعف و يتحايل
بلاك يقدر يبدّللها النظرة
يبقى يهدر و يعاود و يحاول
بصّح محاااااااال يقدر يغيّر الفطرة....

بقلم : سعاد رويبة

السلام عليكم و رحمة الله وبركاته

تعابير رائعة و الاروع هو تناسق الافكار و تتابعها...
و لكن رغم ان هذا واقع معاش فالحمد لله أنه لا ينطبق على كل النساء...
فهناك من النساء من تتزين و تتجمل بالقناعة و الرضى و هذا ما يجعلها ملكة بنظر زوجها و من حولها و ان كنت تلبس أبسط ثوب و أرخسه...

شكرا على مرورك عزيزتي....

يا اختي على قد صراحتك في القصيدة انا راح نكون صريحة معاك اولا بالنسبة للشكل والتنسيق والكلمات انت مبدعة ماشاء الله عليك ضرك نوصلوا للمضمون ونبداو بالعنوان (لو كان المال رجلا لتزوجته كل النساء) اسمحيلي بصح هذ الحاجة ماتنطبقش على كامل النساء على هذيك مانقدروش نقولوا(لتزوجته كل النساء) وكاينة حاجة ثاني المراة راهي تدي غير في الشيعة بلي تبع الراجل على جال دراهمو وتقبل بيه كيم كان يكون المهم يكون مرفه ونسينا حاجة مهمة الراجل ثاني فيه الطمع صدقيني انا شفت في حياتي الاف والاف الحكايات تاع رجالة خدعو نساء على جال الدراهم يروح ليها ويقوللها كلام معسول ومن بعدا يطيحها في الشرك تاعو ويبدا ينحيلها في دراهمها بداية بفليكسيلي ونهاية بمديلي وعاونيني باه نبنيو دارنا المستقبلية ومن بعدا تسمع بيه تزوج واحدة اخرى بدراهمها هي وكاين وكاين خير ربي من هذ الحكايات وانا سمعت ثاني بحكايات على رجالة تزوجوا بنساء على جال دراهمهم هي تخرج تخدم وهو قاعد في القهاوي لا خدمة لا والو وكي كرهت مسكينة عيات وحبت تحبس قاللها:كي تحبسي انت الخدمة شكون يصرف على الدار؟
راني فاهماتك راك حابة توصلي فكرة انو الواقع تاعنا ولا يمشي بالدراهم كي مايكونوش عندك انت ماتسوايش المعاملات كامل ولات بعدد المال لي تملكيه بصح الحاجة لي راني حابة نقولهالك هي اذا راكي حابة توصلي هذ الفكرة وصليها على المجتمع كامل ماشي غير على المراة مسكينة وحدها في كلا الجنسين فيهم وعليهم ماتقوليليش المراة اكثر من الراجل انا راني نشوف فيهم كيف كيف على العكس بدا الراجل يطمع في المراة اكثر مما طمعت هي فيه هي على الاقل نقدروا نقولوا ماشي خدامة وتحوس على لي يعززها وزيد الخدمة ماهيش اجبارية على المراة شوفي هو لي خدام لاباس بيه وينحي لمرتو دراهمها ماشفتيش هذ الحالة؟؟؟؟اسمحيلي بصح هذا واقع

شكرا عزيزتي ......تأكدي أنني أعلم كل هذه الامور... و أعلم أن الرجل يحب المال أكثر من نفسه أنا بدأت بالنساء أولا لأتفرغ للرّجال و إنتظري جديدي بعنوان لو كانت المرأة مالا لركض خلفها كل الرجال .. بعدها قارني و احكمي و ستدركين الفكرة التي أرغب في ايصالها إليكم......

يعطيك الصحة أختي كلام في الصميم ومن الواقع
المشكل راه فيكم أنتم يا معشر النساء، حنا الرجال هذ الزمان صعاب علينا وأولاد لحرام غلاو علينا الشربة، ماخلاولنا والوا، الزوالي اليوم غير يخبي ويرد لقلبوا، والنساء (إلا ما رحم ربي) غواتهم الفانية وحسبوها للـدْوَام، والرجال (إلا ما رحم ربي) فيهم وعليهم، أداهم هواها وغرقوا في وسط بحرها.
يارب إني أسألك العفاف والكفاف
( اســمـــحـــولـــي إلا غــْـلــَــطــْــت)

ما غلطت ما والو هذا هو الواقع و الصح يجرح كيما يقولو شكرا على مرورك العطر أخي....

عشقتيلي في المال لا ضمير لا بال اصبحتي كي الخيال و عليك ما بقالي نسال
نحمد ربي الستار نجاني من هاذ القفار نسيم في كلامو قال التوالى يجيبو لخبار

بارك الله فيك الاخت

هههههههههههههههههههههههه
ما هم روي شعرك الملحون هذا

و ما هم مرورك
إن كنت ترى انه ليس منه داع أخي الكريم.......