تسجيل الدخول

بعد السلام
هل من مزيد ،زودونا بقصائد الشاعر جلول جلجلي الرائعة والمفيدة جزاكم الله.

سأزودك بقصيدة شاب الراس كاملة ، و ان تريد اعطيك اياها مسموعة لا مشكل
فيه قصيدة اخرى بصوت الشاعر ذاته هي في الغزل ، و الكثير ان شاء الله ، شكر

أخي بلقاسم لا أعرف كيف أشرك ،ولم أجد أحسن من كلمة شكرا، فشكـــــــــــــــــــــــــــــــــــــــــــــــ ــــــــــــــــــرا
ويا حبذا لو فعلت ،وجزاك الله عن مشاق الكتابة خيرا.
تقبل أخي تحيتي الخالصة وتشكراتي.

شاب الراس وذرك تبياض اللحيـة وياقلبي ماتلانا فى الصغر مقــــام
صغري كله ضاع من بيـن أيديـا وحتى كبـري ذرك يمشي كالمنـام
ماوجدت أعــوين نديه معــايا ولاسبقت عـوين نلقـاه القــــدام
سامح فــي فرضي المكتوب عليا وأنزعك فـي الضامنة لي بالتقســام
كل أنهار يفــوت محسـوب عليا وانيا زاهي مــاحسبت أحسـاب أيام
مـاشي واعد الآخرة غي بيديـا كي نوصل نلقى ذنوبي بالعــــرام
أي قلبــي أجلس بيــن أيديـا وأيا ياقلبـي أنعيـد عليـك أمنــام
تخلينى مـرتاح في هـذا الدنيـا وعـايش متهنــي ومابيا تخمــام
وعلى غفلة أصبحت طايح فالوطيا بعد أن جسمي طاح ونهـدوا لعظـام
حضروا نـاسي قاع ولحق غاشيا والحبيب ليـزورني يخـرج تمتــام
راحو يجــروا لطبيب وجـاليا وبعــد فحصني قال غير على ليـام
حتـى واحــد مابغى يسمح فيا وطمعـــوني نبــرا وتجدد لعوام
واحـد ماشي طامـع يسبب لـيا ولاخــر باغيني نداوي فـي حمـام
واحد قـــال أدواه ذا عند الأوليا واحد ثانــي قال ذا يشفيه الحجـام
وأنا يا منالمرض درقــوا عينيا ومن الحمى أدقول رانـي فـي الحمام
في ركنة مطـروح ويرقـــو فيا مانتحــرك مانطيق نـرد أســلام
وسهــل ربي خفف المـوت عليا وأخرجت روحي من الصدر كخيط قيام
خرجت روحي مشــات ماترجع ليا وأبقى جسدي مايرد لحــد كـــلام
صبحــوا ناسي من فراقي بكايــا وأنقلب حوشي من الـزقا والحال غيام
يــاك أولادي بكــاو بالدم عليا وقالــوا بعده ماتـلا للعين تنـــام
المــازوزي مسكين ماعارف حيا يجري وســط الناس ووجـهة بسام
من حاله صديت فــي قلبـي كية غير صغير علـى تلاثة خصص عام
مـوالف غير أنبـان يدهكــل ليا يقعــد عنـــدي نلعبـه حتى ينام
ومع الخرجة يـاك يتشلبــط فـيا يبـغـيـني نـديه وانـأيـا خــدام
كـي نرجــع نلقـاه يتسنى فيـا ومانســلك مـن قصته غيـر إذا نام
وهــاراني صديت وتركت الدنيـا وهـذا اللـيلة يا وليـدي ويـن تنـام
أم أولادي أرغـات فـي وذنـي ليا وكثـر أرغـاها يـاك فتتـلي لعظام
تـبكي بكـي أهبـال وتنـق علـيا لـوما شــدوها أروحوا قـاع أتوام
ياخــداع أمشيت بالـزهـد عـليا مـاقلت علـى خيـر ماقلت السـلام
غيـر البـارح يـاك ناديت عليا قـلتلي كـي نبرى أروحـوا للحمام
غيـر البارح يـاك ضحكت عينيا وقـلت أنا مازال نطمـع في ليـام
وثـــرنتك خــداع وتزلبح فيا عيب عليك وعار هاذ الشي وحــرام
أصبح دمعي على خدودي جـرايا وأصبـح قلبي كيشة فــي يد اللحام
ياخــداع أهديتني لمــن بـيا واش تسـال خليلتك فـي هذا العـام
ياخــداع عــلاه صديت عليا يـاخداع عـــلاه تهـدالـي ليـتام
يازهــرة قلبي وقــرة عـينيا ياعــز الكبــدة ويـاميرة لـريام
يــاك مضاري فيك نلقى العزمية او وقت الحـزة غير بخيالــك نقيام
وكنت كـالوردة في قلبي غي هيا وكنت كـي القمرة في ليلي كي يظلام
كنت خير عشير فـي العشـرة ليا وياعــزي مافيكشي حاجـة تتـلام
وكنت راحـــة بال وركيزة ليا وكنت شمس ربيع كي جوي يغيــام
كنت مــاكنت فــي الدنـيا ليا عمر اللــي كنتيه مـايكفيه أكــلام
ويـاك مضاري بيك عندك عقليا واش صــرالك كيف خلطتي لكلام
خــافي ربي لاتـنوحيش عـليا يــاك الموت امحتمة مـاكان أدوام
ماهي أزهر أنقول طاحت غي فيا ماهي مـال أنقـول نتسلف غي عام
مـاهي بيدي نقــول نديك معايا ولاهي بيدك تقسمــي عني ليــام
ياهــولي نوصيك إيـلا كنتي ليا هاذ الويغش لا تلــوميهم بـكلام
المــازوزي نبغــيه كيما عينيا وبعد فراقك خايــفه يحضى يتــلام
غــدوة حين يفيق ويقــول بايا قــولي لـه مازال في الخدمة خدام
ويلا حســوه طــول البكي عليا وريلـه تصـويرتي يضحـك وينام
أورانــا متســامحين يالوخيا نطلب ربـي يصبـرك فـي هذا العام
نطلب ربــي مايــوريك بليا نطلب ربـي يحفضك مـن كل حرام
أوراني راضيك مــادمت حـيا وأرضاي عـني لا تحافيني بـكلام
خـلينى نلهى بمــا سـاير بيا وخــليني نمشي مهني لا تخمــام
جــابولي غسـال واتكـلف بيا يـاحســرا ه أنـا مـوالف بالحمام
عـرا جســدي ماهدا فوقي حيا وغسلني من الراس حتى وصل لقـدام
بعـد أن غسلني جابـلي كفني ليا أقطيعة بيضة مايسـاومها ســـوام
يـاذ الخلق عـلاه تتمسـخر بيـا ياك مــوالف كسـوتي فيـها لكمام
أمــوالف سبـاط كـاسي رجليا تهــداني لـياه حـافي مـن لقـدام
واين السروال والقمجــة الغربيا وين الجيب اللــي متــن التـزدام
نــرجا فيه يــرد مارد عـليا واثـرنته أنـــا تلف عـني الكـلام
فــالوقت المعـلوم أتجمع غاشيا مـاتسمع ضحـكة ولا تخزر تبسـام
ويـــادلالي لا تعيــدوش عليا ومع الخرجة ماصار في حربة ليتام
المازوزي مسكين طايح في الوطيا ولامن خـاف عليه مـن كثرة لقـدام
وثرنته مخلــوع مــافاهم حـيا ماهو يبـكي ذا الطفل ماهو بســـام
غير يصحــح لاغنا يخــرج فيا وانيا ملمـوم فـي كفني تلمــــام
ياعظيـمي نســوه بالهــدرة فيا وخلوني نمشي الحال قصد ظـــلام
وما دارو لبزوز بالبـــكي حذايا ومـــادارت بخـدودها ميرة لريام
ياحســـراه وصــايتي والعقليا وياحسراه على أختي زهرة ليـــام
كي المجنون تنوض وتطيــح عليا وموعرها ببكــى ومقسحها بكــلام
ياجـلول عــلاه تستشفى فيــا ماني زوجـة خاينة مادرت أحــٍرام
وأمــوالف عند الباب تتلـفت ليا أومحــلاك بنظرة أومحلاك أبتبسـام
وأتســولني ناقصـتنــي حـيا وبــاه نرد عليـــك يتلفلي لكـلام
جيب الخضرة ولاتجـيب زروديا ولاتنــسى لتاي لاتنـسى لــيدام
ولاكـانش ديسير للبــز أشـويا وأخبــرني مرقة أغدانا ولاأطــعام
وأجـيب أحبيبة مسكتة في يدك ليا أوخـلي ليا بــاه نمشي للحــمام
ياخـــداع اليــوم ماسلت عليا ورحــت مغطي مـابغيت ترد كلام
حـــرمت النعـمة مع النوم عليا وبعـدك حتى الضحك عني راه حرام
وشوف لحالي شوف ماصاير بيا وشوف لدارك واش صاير في ليتــام
ياجـلول عــلاه تستشفى فيــا يـاك عاشرتك بالصفا مادرت أحرام
وأمــوالف عند الباب تتلـفت ليا أومحــلاك بنظرة أومحلاك أبتبسـام
ويجـــوك أولادي شوارك جريا وما كثرهم بزقــا وما كثرهم بزحام
واحـــد طامع فيك تشريله حيا ولاخــــر باغي يتبعك وانت خدام
وتتبسم وتـروح تهــــداهم ليا هذا يبكــي وذاك متزعف تمتــام
وياجلول اليـــــوم ماسلت عليا ورحت متلمد لاحـــديث ولاتبـسام
خـليت أحــوالاك مليوحــة ليا أوخـليت السـاعة أوجيبك فيه الزدام
وخليت تصاويــر عندي محظيا لو نخزر فيها تحطمني تحطــــام
وياظالــــــم لله غي رد عليا وخبــرني كيفاش نعمل في ذا العام
يالســامع بالسيف مـاخرجوا بيا كفني غي ربي ويحظي خيط فيـــام
خطفوني وهداو ولفــي في الوطيا الوجه تقردش والشعــر تبشم تبشام
رفـــدوني وخضاو للمدينة بيا لـو تتبعنـي واش يوصلك أكلام
واحــد قال أرخيص مايسوى حيا ولاخــر قال أثمـين مثلـه ما يتسام
دخلــوا القرابة وخـرجوهـا بيا وصلوا سيــد الشيـخ دخلوا باحترام
حطـــوني قــدامهم فوق الوطيا أوللـقبلـة دارو صـف ورا ليمـام
كــي كـبر صــلاو بالسر عليا وبهــزت ليا أجمــاعتي بعد السلام
حطــوني فـي قبر معبــورعليا وصــددني تــراس للبيت الحـرام
عــرا وجهي من الكفن وخزر فيا وأتنــهت وبــلاه من حالي تخمام
وسواو الحجرات غــي بالعقـليا وياهــولي مـن فوقهم زادوا عرام
ياناسي لله غيـــر أدعـــوا ليا أوقــولوا ياربي أغفر مادار أحرام
بكــر أولادي بغــى يدير الرجليا جات دموعها هاطلة وفواده عـــام
الناس تصبر فيه والصبر أمـــزيا وهو ساهي مافهم للناس كــــلام
ياولدي براك من البكي عليــــا بكيك مايشفي ولا يحي لعظــــام
واسمحـــــلي لله نوصيك وصيا تبعها لبغيت تنـــجى من الحرام
احـــرز روحك لاتوالفش الدنيا ولاتعشق فيها ولاتطمع بــــدوام
وعبد من سواك صبحا وعشيا وصليله فـــي الليل والغاشي نيام
وكون ارزين وكـــون مولى عقليا وشـــد لسانك لاتكثر بيه أكـلام
لاتمزحش أكثير تندم فــي الدنيا ويحضى بخص الناس في عرضك سوام
واحكم في عينيك واقسط في المشيا وأحصن فرجك لا تقرب بيه أحــٍرام
صفي رزقك كــون زاهد في الدنيا وقهر نفسك كون لهواها فطــــام
الدخـــــــان أخطيه علة وبليا وعند النـــاس الفاهمة مكروه أحرام
ايكره لنفــــاس ويهـــد الريا والقلــــب يعييه ولجــسدك هدام
لاتغتب لاتصاحب أصحــاب الدنيا لاتمشي في النــــاس بلسانك نمام
أعليك العســــاس صبحا وعشيا يجـــردلك في فعــــالك بالتمام
يشوف لـــي باينة ولي خافيــا لاتغلطتش تقول يســهى ولاينــام
إذا كنت فقير مــــاتكسب حـيا الحـــرفي فـي الجوع تلقاله ليدام
واذا تاخــــــد خذ طفلة دينيا لاتاخـــذ لي خبرها فــي لفـوام
وأصحب ناس العلم واهل العقليا وهويــــاك تكون لــعان وشتام
لــي ظلمك ياك غير دار مزيا ويوم الفصــل يردلك حقــك بتمام
أعشر قـاع الناس عشرة مرضيا وكــرم جــارك لاتشد عليه أطعام
لاتحقرش أضعيف طايح في الوطيا لاتغلطتش تقـــول ممتني بعــظام
لاتظلم مسكين مــــاطاق لحيا أولا تعبــد مركانتي فــي ماله عام
لاتغلطتش تقـــول رزقي بيديا الخـــــالق هـو الرزاق والقسام
لاتغلطتش أتقول زهدي فـي الدنيا ينقذني فـــي لآخـرة يوم الخصام
وهرب ليه برحمته عالــي العليا رحمــــة ربي مايقومـــها قوام
دايرها تنجي أصحاب المعــصيا ينقذ بها مــــن بغا يـوم الخصام
لاتقنعشي بالعـــــلوم الدونيا عمـــر القشــرة مارضا بها فهام
وشوف وراها للكنـــوز المخفيا تصيب الحــكمة كامنة في كل أمقام
هذا رمـــز الله في نص الآيـا في قصة مـــوسى ولخضر والغلام
لاتقنط لاتقول واش صـــرا بيا أدست لـــــوراق وترفعت لقلام
ياوليدي نوصيك وتصـــنت ليا أحـــرز روحك لاتخالطتش الحكام
خلطتهم تعطيك ياســر في الدنيا ويوم يدلوك في القبـــر تلقاه ظلام
عند الهدرة أتقول عنهـــم أوليا وياك الكثرة غيــــر خيان وظلام
كثرتهم لاهين في لهـــو الدنيا كثرتهم ماليين بالكـــذب والحرام
سمع أخوتك قاع هــاذ الوصيا ولاتجحدها على يفهـــم لكـــلام
واتهلــى في اميمتك دير امزيا وقوم مقــــامي لاتبدل بيه أمقام
ونوبة نوبة ديــر معروف عليا للفقـــراء والمســــاكين واليتام
وجيب علي فاتحة في كـل عشيا كي تبدو لفطـــور في شهـر صيام
واطلب ربي يلطــف بلطفه بيا ويحشرني فـــي زمرته سيد الأنام
ولاك بعقلك شـوف وتسخبر فيا ودير في راســــك باش تتلقى ليام
من داري صـديت ماجايب حيا لاقطيعة كـــتان سترتلي لعظــام
ياحســـراه على الناس لي ليا وياحســــراه على لـي بيهم نقيام
ياسر منهم ياك من نــاح عليا وياسر غير واكالــــين أطعــام
دفونني ومشاو مســـالوا فيا وعقبوني للـــــدار وبداو التقسام
وانيا قليل مانكســــب حيا لاذهب مخـــــبي ولابنيان رخام
وتمسيت وحيـــد لاحد معايا لامن سمــــاني نجيب معاه أكلام
وطـاح الليل علـى القبـور المنسيا وأنشر فـوق المقبرة خيـدوس ظـلام
وأتساوت النــاس فـي هذا الوطيا كـي لي مات اليوم كلي عندو عــام
كي لي مـات أصغير مايعرف حيا كي لي مات منين نشفو لو لـعظــام
مــاتفرز قــليل تــحت القبرية وماتفرز مــركانتي تحــت العرام
أبقـــاو على خيــر ياناس الدنيا وسامحني يـالي عمـلت معاك ظلام
يـاربي ياخـــالقي عــالي العليا يامن نــزلت رحمته فـي كل أمقام
جيتـك طامــع فيك تستـجب ليا واللي طــامع فيــك عمره مايتلام
جيتك عبــــد أفقير ماجايب حيا جيتك عبد أضعيف ماطــايق لخصام
فضلك فضل أكبـير عـني في الدنيا وانــا شكري ليـك مايسواش أقرام
لومـــا فضلك مانعيش ولا نحيا لومــا خيرك مــانقوم عـلى لقدام
وانا خيري أقليل مابـــــان عليا وياويحي قــــداه درت معاه أحرام
ماصـليت أوقـــات مكتـوبة فيا ولاقـمت بسـنة ولا كمــلت أصيام
جـــــرتني في وادها هاذ الدنيا وزلبحني رايي وفرطت في لــرحام
ماسلـــــكت الديون ماكثرها فيا ولاصنت لســـاني ولا بعدت احرام
هـــاني بين أيـــديك لاحيلة ليا أوجـــود بفضـلك ياكريم وياعلام
وسع عنـــي يالطيف والطف بيا وغفر ذنبي يالي تحـــــي لعظام
وسهــــل ياربي للأحباب اوريا وصبر ناسي على فراقي فـي ذا العام
ياقلبي لاتخاف رانـي فـي الدنيا أومــالك ترجـف ياك هذا غير أمنام
وين الكــوراج والصـبر والعقليا يــاك مــوالف بيك في الحزا نقيام
افرصني حتى تــــرشقوا عينيا وقلت منامي جـــا وقصفتلي ليـام
واتكلــم لي وقــلي في هذا الدنيا أعطيتك عـــاهد ماندل عليك حرام
في ذا الصبحـة راك فــاجيت عليا مزين ذكـــر الموت في سعة ليام
ودخلت ولفي فـــي يديها الصينيا والمـــازوزي جاي يدهكل بســام
وافطـــرت انــا والبزوز وهيا محــــلاها نعمة على العبد اذا رام
بارك ياربي في هـــــاذ الذريا واحفظنا ياخــــالقي من كل احرام
وعند الــباب رميت بالعين اورايا نلقى السمـــــرا موادعتني بسلام
قوليـــلي لخاصتكـــشي حيا ياشطانتي خاطــــري ريمة لريام
تتبسم وطــــــول الخزرا فيا ومحـــلا ذا النظرة ومحلا ذا اتبسام
جيب الخضرة ولاتجـيب زروديا ولاتنــسى لتاي لاتنـسى لــيدام
ولاكـانش ديسير للبــز أشـويا وأخبــرني مرقة أغدانا ولاأطــعام
وأجـيب أحبيبة مسكتة في يدك ليا أوخـلي ليا بــاه نمشي للحــمام
وجاو أولادي قـــاع عندي جرايا وياك شحال زقا وياك شحال أزحــام
والمـــــازوزي مزير الشدة فيا ومــــن الزهر اليوم مانيشي خدام
لاتبـــــكيش اليوم نديـك معايا ونشري لولــدي كورني مليان كرام
وبقاي علـــــى خير ياعز اهنايا وديري لينا للغـــدا كسكاس أطعام
ياسامـــع لبـيات نعطيك أسمـايا وأدعيلــي بالخيـر فـي آخر لكلام
أكتب جيــم ولام وأختمـــهم باليا وأديــر قبلهــم باش تفهم جيم ولام
والصلاة عليــــك خيــر البرية صـــــلاة ترضيه ومعاها سـلام
وعلـــــى آل البيت وعلى الآنبيا وعلى المــرسلين والســادة لعلام
وعلـــى التابعين جملــة والأوليا وعلى ليســــال في نهـج الإسلام
قـــدر الخلق الساكنــــة للبريا وقـــدر لي في جوف الما عــوام
قـــــدر الخلق لتشوفــه عينيا والخــلق لي محجوب في عين الأنام
قدر الخلــــق لي ساكن في الدنيا وقـــدر لي مازال يخرج من لرحام
والحمـــــــد لله صبحا وعشيا ليجـــــاد علينا بنعمــة الإسلام
والشكــــــــر لله مول الخفيا صاحب الجـــلال صاحب الاكرام

مادامت لكـــــوان مادامت الدنيا وما دامت لحـــروف تكتبها لقلام

بارك الله فيك أخي بقاسم وجزاك خيرا ،لقد وعدت ووفيت .فشكرا

هذه القصيدة سبريلي كاس بصوت الشاعر نفسه
http://www.4shared.com/file/14311642...ilya_Kass.html

واسمح لي نحدثك على الوقت الشين ***** ذا الوقت لي كهمومــه كي غاشيه
ضاع الوعد وماتلا للناس يمين *****ولى العلـــم لا الجهـــل يقود فيه
وعم الظلم وشاع ياويح المسكين***** وياويح لي بلا اكتاف وطاحت بيه
وتلف الحيا ومابقا للغاشي دين***** غي دين الهدرة بـــــلا فعل يزكيه
وجار الفسق وجاهرو بيه الشينين***** وبار الصدق وبار من يتحدث بيه
مول العلم بين الناس أحزين***** والجاهــــــل مبسوط لا من ينويه
واحد عايش عيشة أهنا وتسلطين***** ولآخر غي هم الزمان يكاوح فيه
واحد حاير في عشاه يجيه منين***** ولآخر طامع في السما باغي يشريه
واحد الصحة التامة والعظم متين *****ولآخــــــر ذبانة تخاف تحط عليه
واحد زهره وين يصد يصيب عوين***** ولآخر زاهد سعده مالقى لمن يعطيه
واحد كامل في العقل ثابت ورزين***** ولآخـــر صوفة طايرة عقله خاطيه
واحد حاصل في الصلا يبداه منين***** ولآخـــر يعرف للكتاب وسامح فيه
واحد مرته جامعة للحيا والزين***** ولآخر عـــــواوة وثاني تحكم فيه
هـــالاه الدفلة تولي عسل ابنين***** ويولــــي شهـــــد النحل لمن يشريه
ولد البية يطيح في القيمة ويهين***** وديره الكـــــلاب صيد وتنبح بيه
والدين لي كان عند اصحاب الدين***** ولات الفســـــاق تشري الدنيا بيه
سربيلي كاس بالنعنــاع بنين***** زيـــد اعطيني ڨارو نتونس بيه

و هذه قصيدة لمحفوظ بلخير من روائع الشعر الشعبي ، وهي
لها قصة كبيرة و هي بهذا الرابط
http://www.echoroukonline.com/montad...d.php?t=148746

هذه القصيدة كنت اعتقدها من كلمات عطا الله ام انه المؤدي والكلمات للشاعر -جلجلي وهل الشاعر هذا هو ابن ولاية البيض صديق عطا الله الذي دخل السجن بسبب قصيدة او ذاك جلجلي اخر
وشكرا مسبقا

صاحب القصيدة هو جلول الجلجلي مهندس معماري من ولاية البيض
و لكن قضية سجنه من عدمه لا ادري ، لكن اعلم ان القصيدة وضعت
سنة 1984 و نشرت في احد الجرائد بعدها ، كما له عدة قصائد من
شاب الراس في ذكر الموت و هي طويلة و التي وضعتها ، و فيه
قصيدة سربيلي كاس نعنان و الكثير من القصائد ، و الشيخ
عطا الله او النائب عطاالله غنى هاته القصائد و شكر

القصيدة للشاعر جلجلي جلول ،وعطا الله غنى بعضها ،أما حديث السجن فلم يسجن لاهذا ولاذاك والله أعلم .