تسجيل الدخول

حكاية يتيم...

سهرانة وحدي مع لقمر
قاعدة معاه قعدة خلويّة
دعيت لربي يرفد عليّا الضّر
و ينسيني همومي شويا
يقويني و يعطيلي الصبر
على موت و فراق والديا
نضت صليت وقت السحر
محيْره و الدموع ماليين عينيا
كيفاش نبدا من الصغر
نحمل و نرفد المسؤولية
مزالني صغيرة و لحمي حمر
مزالني ما نعرفش لهاد الدّنيا
كيفاش رايحا نقدر
على هاد الهم و هاد الميزيريا
خايفا نخلّي خاوتي لشّر
خايفة نضيّعهم بيدييا
راني وحدي عافسة على لجمر
و فاميلتي كامل تخلاو عليا
ملّي غاب بابا و يمّا ما بان عليهم خبر
سمحو في خاوتي و فيّا
ما لقيت حتى واحد يجبر
بخاطري و خاطر لبراءة هاذيا
جاز شحال من يوم و شحال من شهر
و أنا نتخبّط حتى جاتني فكرة هيّ
نحبّس قرايتي و ربي يستر
ياك وصلت للمرحلة لجامعية
نروح نخدم و ما عندي ما نخسر
و نجيب اللقمة لحلاليّا
لقيت خدمة تم تم و قلت عندي الزهر
هاكدا نعيّش خاوتي بلا ما يديرو فينا مزيّا
بديت نخدم و بدات لمصايب عليّا تنهمر
و حملت شحال من جياحة و بليّا
هادا يكيّل و هادا يدصر
و هاداك يحب يجوّز لوقت بيّا
و كاين لي بعينو يحقر
كي يشوفني يتيمة و زواليّا
و لوخر حاب يحكي و يقصّر
باش يقيس و يشوف العقليّا
و كاين لي حابني معاه نفطر
نروحو للمطاعم و للبيتزيريا
بقيت حاملة و ساكتة بلا ما نهدر
و حالفة واحد ما يقرّب ليّا
كان لازم نكمّل و نصبر
حتى يفرّج ربي بكاش هديّا
سالو دموعي كي لمطر
على حالي و حال هاد الدنيا
مالقيت حتى واحد بيا يشعر
خلاوني كامل حتى الفاميليا
قلت المهم نحفظ روحي و نعْبر
المرحلة و لمحنة هاذيا
نقسّح قلبي كي لحجر
و نتعلم نولي حيلييا
هاكذا باش نعرف نسيّر
أموري مع هاد لوحوش الغابية
تكلت على ربي و دخلت للبحر
ياك هو لي خلقني و هو مولايا
يحميني من لغرق و لغدر
مع هاد لعقول الغبيّة
لي راهي تشوفني لحم و هبر
و في كل دارا طامعة فيّا
كملت طريقي بلا ما نخيّر
واثقة من ربي و دايرة فيه النّية
حتى جاء النهار لي فيه حالي تغيّر
و قدرت نوقف على رجلييّا
لقيت خدمة محترمة و بمصروف معتبر
نحيت بيه الهم على خاوتي و عليا
حمدت الله و قلبي يبكي و مأثّر
كي لقيتو معايا و أنا وحدانيّة
و من هاد التجربة أدّيت العبر
مكاش لي يخمم فيّا من فوق والدييا
سبحانك يا ربي يا خالق لبْشر
سبحانك ليك بكيت و لغيرك ما نرفد يدّييا
ليا و ليكم راني نستغفر
و ربي يحمي و يحفظ كل وليّة

بقلم سعاد...رويبة
*

رائـــعــــة
موضوع حساس ورانا عايشينو اليوم بزاف، كثروا أولاد الحرام الطماعين اللي ما يخافو ربي.
اللي عندوا والديه ربي يحفظهملوا
واللي راحوا عليه والديه كاين ربي سبحان هو الخالق واللي خلق مايضيع
أبقاي كيما راكي ، راكي في المستوى

شكرا.. كلامك يشجعني كثيرا

وانا نقرا ما حكمت ماء انهمر

وسالو دمعات من عينيا

تألمت كثير لحال البشر

ذيوبا صارو في هاد الدنيا

انيابهم مغروسة فالظهر

منشوبة فكل مسكين وولية


سعاد قصتك تذوب الحجر

وقضيتك اكبر قضية

حكيتي بلسان الكثير من البشر

غدربيهم الزمان وراحو ضحية

لكن الحمد لله الخير عندك انتصر

ونجاك من شر البلية




لا حرمت بوحكـ المتدفق تدفق سيول العواطف في زمن الجماد

و الله بدون مجاملة اسلوبك رائع رائع
ينقصك فقط الاطلاع أكثر على المصطلحات الشعبية القديمة لأنها تزيد في روعة القصيد
أنا هنا لأساعدك في أي شيئ
شكرا مرة اخرى

شكرا على مرورك و على كلماتك المشجعة...أحب سماع رأيك في قصائدي و كلماتك تلهمني و تجعلني أكثر حيوية مشكووووووووووووور جزيل الشكر

راق لي مرورك.. شكرا ..مادا بيا تبعتلي شويا كلام شعبي..علابالي بلي أسلوبي هيبهوبي ..مي مادا بيا نتعلم ..ياك ماشي العيب لي ما يعرفش لعيب لي ما يحبش يتعلمصح عيدك خو

يا طفلة راكي في خطر
كل طفلة لازم تعيش الميزيرية
هدو وحوش ماهم بشر
ويشوفو الطفلة لقمة طرية
من التجارب ادي العبر
يا حنونتي ماكيش بيناتنا منسية
ومن ولاد الحرام ديري الحذر
لخاطر الدنيا هذي هيا
قصتك تبكي الحجر
ورانا حاسين بيك في كل امسية





احرفك ذهبية يجب ان تخلد في كتب العباقرة بارك الله فيكي وسدد خطاكي واهم شيء صبرا جميلا وثقي بالله فهو ناصرك

شكرا لمرورك العطر و على كلماتك المشجعة...صح عيدك و كل عام و أنت بألف خير

جميل جميل بنيتي سعاد
هناك بعض الخلل في الوزن في بعض المواقع اعيد قراءتها مرات ومرات ستحسين بالمواقع وهناك بعض الألفاظ ليست شاعرية هي كلمات عادية فانصحك بقراءة الشعر الشعبي القديم حتى تصقل موهبتك..
عيدكم سعيد..