قصة 3
زوجي ....او جني العاشق
انا احلام ..فتاة مثل باقي الفتيات ...لكن من صغري كنت مفتونة بجمالي و لا احد من لي شافني ينكر هاذ الشي ...كنت معظم وقتي قدام لمرايا نتامل روحي ...كبرت و انا زيني كل يوم يزيد ...رجعت صبية مثل القمر و الخطاب كل يوم واحد ...كنت بطبيعة الحال نرفض لصغر سني و لانو كنت كل خاطب نلقا فيه الف عيب .
توفى ابي و انا في عمري 18 سنة ....بقيت انا و امي و اخي وحدنا ...خرجنا من دار جدي لانهم طردونا بعد وفاة بابا ....يما كانت تخدم و تبيع المطلوع و خويا كان صغير يقرا حوالي 14 سنة هذاك الوقت ...بالسيف يما باه دبرت دار للكرا في مكان شوي بعيد لكن احسن من الشارع ....اول يوم انتقلنا للدار حسيت بشي غريب ..الدار موحشة و الصراحة ما ارتحتش فيها ...كانت مظلمة ما توصلهاش الشمس و فارغة تماما ...قلت لامي انا منيش مرتاحة فالدار هذي قاتلي هذا هو مكتوبنا يا بنتي نسكنو و نسترو رواحنا حتان يفرجها علينا ربي
سكننا فالدار هذيك انا و خويا نقراو انا جوزت الباك و ما ربحتوش هذاك العام سجلت في معهد لتعلم الموسيقى ..و خويا كمل قرايتو كان شاطر بزاف ...و يما بطبيعة الحال تخدم علينا صباح و عشية باه تخلينا حاجة ما تخصنا ...من. اول نهار في هذيك الدار و انا قلبي مقبوض منها ...كنت نلاحظ فيها اشياء غريبة ..نسمع دايما اصوات تاع ناس تعيط ...نقول لماما تقلي نتي موسوسة و بركاي من هاد الهدرة ....خويا مع الوقت انزوى علينا اصبح يدخل يقفل الباب على روحو و يقعد وحدو ....انا حبيت نفهمهم كاينة حاجة غير طبيعية خاصة بعد اذان المغرب كنت نخاف نرقد وحدي ...للاسف واحد ما صدقني و ما حب ياخذ على كلامي
و الخطاب كي لعادة مع انتقالي للحي جديدة يسقسو هدي بنت شكون لكن انا ما كان عندي ميول لحتى شخص منهم و كنت نرفض بلا منعرف حتى شكون الخاطب ....كنت نحس بحوايج مكنتش نعرفهم في هذاك الوقت ..كنت نحشم نسال ماما ....
بقيت على هاد الحالة شهور عديدة ...كنت دايما نتفقد روحي فالمرايا ...مع لوقت حسيت شعري بدا يطيح و ينسل ....نجي نحكي لماما تقلي نتي عندك وسواس قهري اقراي قران و بركاي من هاد الافكار ...اكتئبت صراحة و عدت ما نطيقش الحياة ...و نفس الفيلم يتكرر كل ليلة ...الافكار والاحلام
في يوم من الايام خويا رجع بكري للدار من المدرسة ..سالتو انا و ماما علاه جيت قالنا مقريناش و دخل كي عادتو لغرفتووو ...جا لعندي قالي ختي ادا عندك فولار راسي وجعني و حاب نزيرو ...عطيتو فولار و رجع لغرفتوو ...بعد شوي جا لعندنا فالكوزينة كانت ماما تطيب فالمطلوع ....باسها من راسها و قالها يما اعطيني ناكل توحشت المطلوع نتاعك ...يما حست بشي غريب عنقاتو و قالتو تفضل بني كول بالصحة و الهنا ....قعد قصر معانا شوي و رجع لغرفتو ِ....لحق وقت العشا. راحت يما لغرفتو تناديلو نتفكر صرخت صرخة وحدة ....رحت لعندها لقيت خويا فالارض مرمي و الفولار حول رقبتو ...ايه انتحر مشنوق. ...انتحر و حرق قلب امي و قلبي معاها و خلانا مكويين عليه ِ..لي زاد حرقنا وش هو الشي لي دفعو يعمل هكا ...دفنناه بجنب ابي و قعدت وحدي انا و امي فهاد الدنيا
يما تعبت بزاف بعد وفاة خويا و عادت كل يوم تجيها كوابيس....قررت باه نجيب راقي يرقي الدار لانو من اول يوم دخلتها عرفت فيها شي غير طبيعي ...جبت راقي و جا للدار....امرني انا و يما باه نخرجو من الدار باه يلقا راحتو ....بعد مدة من الوقت خرج من الدار و قالنا ربي يهديكم كيفاه قدرتو تعيشو فيها ...هاد الدار يسكنها الجن من قبلكم و راكم تعديتو على ملك من املاكهم ....انا بديت نترجف مع انو كنت عارفة هاد الشي ...قالنا للاسف ياو متخرجوش منها تموت وحدة فيكم مثل ما مات خوكم ...الغريب انو سمالي انواع بزاف من الجن منهم دهار و مطرش و قعد يحكيلنا على اشياء بزاف منتفكرش منهاكثير ....قررت انا و امي نهزو حوايجنا و نغادرو الدار في اقرب وقت
حالتنا كانت صعبة ...كل ما نحوسو على مكان ننتقلو ليه منلقاوش ....رجعت انا و امي نشغلو القران في الدار ....انا نشعل التيفي باه ندير قناة القران اول ما يشتغل القران يطفا التيفي ....كنت خايفة و مرعوبة لكن مع الايام تعودت على هاد الحالة ..ماما كانت مريضة بزاف و كل يوم تزيد حالتها. تسوء كثر و كثر .
لحين ما ربي سبحانو اخذ امانتو و لحقت امي بابي و خويا ...قعدت وحدي انا فالدنيا هذي لا انس لا انيس معايا ....تعودت على العيش بالدار هذيك و كنت نستنا نلحق اهلي لانو كرهت العيشة بعدهم ...حتى الخطاب لي كانو يخطبوني راحو ...حسيت الناس رجعت تنفر مني و ما تحبش حتى تتكلم معايا .ِ....صلاتي كنت اصلا نسيت حتى كيفاه نصلي ... اكتئبت و رجعت نقفل على روحي باب الدار و نقعد نسنا في الموت تديني و نلحق اهلي ....
لحين ما في يوم من الايام دق عليا الباب ...استغربت شكون حيزورني في هادالوقت....فتحت الباب لقيتو الراقي لي جبتو للدار ..قالي بنتي سمعت بوفاة امك علاه مخرجتوش من الدار كيما وصيتكم ....حكيتلو اوضاعنا و بلي هاد الدار المسكونة هي الملجأ الوحيد لي عندنا.
كان انسان طيب و قالي بنتي حالتك ما تعجبش انا ناخذك معايا و نكفلك في منزلي حتان تتسقم احوالك ....رحت معاه الحق كانو اناس طيبين و استضافوني ....كان متزوج و عندو بنت اكبر مني متزوجة و ولد قدي فالعمر ماكث معاهم فالمنزل ...قررت نتشجع و نحكيلو على الحالة لي تجيني فالليل ...على تخيلاتي الغريبة لي كنت ما نلقاهاش تفسير ِ...عرضت عليه يرقيني و تشجعت نحكيلو و نصارحو بالشي لي راني نعاني منوو .....
حكيتلو كلش بالتفصيل .....شرحلي كلش و قالي بنتي نتي يسكنك جن عاشق و الظاهر انو يحبك بزاف و يحاول يبعدك على اي شخص يتقدم منك ....ما فهمتش انا وش معناه جن عاشق و خفت في نفس الوقت ...شرح لي انو حالات الزواج ممكن تتم بين الجن و الانس ...فالجن العاشق قد يعشق انثى ..و الجنية العاشقة تعشق ذكر ...و انو حالات التخيل و الانعزال عن الناس و عدم القيام بالواجبات الدينية هي من اعراض الجن العاشق ....و يقدر يتملك الانسان في عدة حالات منها الخوف و البكاء و الحزن و الشهوة. ..
و هاد الشي يكون نتيجة عدم التحصن بالاذكار و النظر الى العورة و المرآة بكثرة ....قررت نحاول نرقي لعل هاد الخبيث يخرج من جسدي لكن هو كان على قول الراقي عاشق حقيقي .....مع كل محاولات الراقي و لي انا مع بداية الرقية نكون غائبة عن الوعي ...تحدث معاه الراقي و قالو انو ثمن خروجو مني يكون موتي ....نفسيتي تعبت و اكتئبت و حاولت الانتحار عدة مرات لكن ربي في كل مرة يكتبلي عمر جديد ....الشي الغريب لي لاحظتو هو نظرات ابن الراقي لي مع انو كنت منعزلة عنو تماما لكن مع خروجي من منزلهم نلقاه يشوف معايا بنظرات غريبة ....قلت يمكن انا لي موسوسة فقط لكن الامر استمر و كنت غير قادرة نخرج من دارهم اولا معنديش ملجأ نروح ليه و ثانيا تشويه سمعة ابنو حتكون اسوأ طريقة نكافئو بيها على الشي لي عملو معايا و انو تحملني و عاملني مثل بنتوو
قررت باش نخرج من دار الراقي و نحوس على سكن يسترني لانو نظرات و همسات ابنو مكانتش مريحتني ابدا ...خرجت من منزل الراقي و توجهت لمنزل وحدة قريبة لي قبلت تستضيفني عندها ....و ما عرفتش بلي حياتي الماساوية لي مكنتش نتخيل تزيد تولي أسوأ من هكا باه تزيد تتبدل ...
كنت كل ليلة نسمع الحس فالدار ...نخرج من غرفتي باه نشوف تجيني تقلي هذو اصدقائي و عارضتهم سهرة عندي و واحد ما عمبالو بيك بلي مستضيفتك عندي ...كنت نسكت و نقفل الباب على روحي ...نسمع يوميا الضحك و القهقهات و الغنا لحتى الفجر .....هدي قريبتي من جهة ماما اهلها اغنياء و موفريلها سكن لوحدها ...انا كنت نخدم عليها فالنهار ميناج و كلش و فالليل نرقد و نسكت ...ليلة من الليالي خرجت من غرفتي نقضي حاجة لقيت زوج شباب في الصالون و هي معاهم ترقص فالوسط ...مع شافتني تخلعت و قاتلهم هدي الخدامة نتاعي سكنتها عندي رحمة بيها ...نطق واحد فيهم و قالها الخدامة تاعك حبة..تحرك من بلاصتو و بدا يقدملي انا هربت و رجعت لغرفتي ..غلقت الباب على روحي و قعدت نبكي و نخمم في حياتي لي تحطمت و اهلي لي راحو و خلاوني وحيدة فهاد الدنيا ...
كان كل يوم يفوت عليا اسوأ من الثاني ...تحملت الاهانة و الذل غير باه في اخر الليل نلقا بيت يسترني و سقف فوق راسي ....عمي الراقي لي جامي نساني كل يوم يعيط يسقسي على اخباري كنت نكذب عليه و نقولو تحسنت احوالي و درك راني متهنية عند قريبتي ....في ليلة من الليالي جات لعندي و قاتلي الليلة حابينك تسهري معانا ....جابتلي فستان قصير و ماكياج و طالون و قاتلي وجدي روحك اليوم السهرة كبيرة و كاين ضيف مهم حاب يشوفك معانا متحشمينيش قدام أصدقائي. ..انا خفت اولا لكن قلت وش فيها نسهر نطلع شوي من القنطة لي في قلبي ...لبست و تمكيجت شفت مع روحي فالمرايا توحشت نشوف روحي شابة ...مرمدتني الدنيا مم الزين لي عطاهولي ربي راح مع الهم و المشاكل ...خرجت نسهر معاهم كنت حشمانة لانو اول مرة نشوف عباد بزاف هكا و شراب و رقص و غنا ...اقترب مني الشاب تاع المرة لي فاتت و قالي هدي نتي ! ...حبة صح مكنتش غالط فيك تبسمت معاه و بعدت شوي ...كانت حاجة غصة في صدري ...حاجة تقولي اخرجي و ارجعي لغرفتك وين كنتي محبوسة ...ايه هذا زوجي من العالم الاخر غار عليا ...
كملت السهرة و انا نحس بروحي راح تتطلع ...كانو يتغزلو بيا و يشوفو معايا و يمدحو بجمالي و نحس روحي مخنوقة حنموت ....قبل ما تنتهي السهرة قدم ليا الشاب هداك لي كان اسمو سيف الدين جبدني من خصري و قالي تجي معايا لفوق نحكيو شوي هنا منقدروش نلقاو راحتنا جبدني ليه ....ضربتو بعدتو عليا و بزقت عليه و بديت نسب فيه ...الغاشي كامل يشوف معانا ...بديت نضرب فيه بالسيف باه فكوه عليا ....انا كنت صح مخدرة وميش حاسة بالشي لي راني نعمل فيه ... هو تشوكا معايا و قالها خدامتك هدي لازمها طبيب نفسي ....تقدملي و قالي متنسايش وش درتي ندمك فيه ولا منكونش انا سيف الدين .....انا كنت مخدرة و فاقدة وعيي حتى القوة لي ضربتو بيها حرت منين جاتني ....اتفضت السهرة قريبتي سبتني و عايرتني و قاتلي الليلة اخر ليلة ليك عندي ....طلعت لغرفتي نبكي و نحس قلبي راح يخرج من مكانووو ...بقيت نبكي و نبكي
كانت اسوأ ليلة فاتت عليا في عمري.....راقدة و نشوف في روحي نتعذب .....نتحرق بالنار اختنقت كنت نحاول نفتح عينيا لكن مقدرتش نحس روحي مربوطة و نتعذب ....كنت نبكي و نحاول نعيط لكن صوتي ميخرجش ...كنت نشوف فيه ايه ...كان على هيئة رجل طويييل و عينيه يخلعو شفت فيهم النار ....جازت عليا ليلة شفت الموت لكن ما متش ...تربطت و تكتفت ..لحق الصباح نسمع في قريبتي تنوض فيا نوضي لشغلك ما كفاش وش درتي و تزيدي ترقدي لهاد الوقت ....نضت رجليا ما حملونيش ...مع ذلك نضت لقيتها في وجهي تقلي انا رافت بيك و منيش راح نحاوزك ...نوضي كملي شغلك كيما العادة و منحبش نشوف وجهك قدامي
نضت هذاك ليوم نخدم شغلي كي لعادة خرجت هي و قاتلي درك شوي نجي افتحيلي الباب ما نطولش ....خرجت و قعدت وحدي فالدار نكمل الشغل ....شوي صونا الباب رحت نفتح حسبتها هي لقيتو سيف الدين قدامي ..خلعت و قتلو مكانش اي خرجت جيت نقفل الباب حكمو برجلو ...قالي عمبالي اي مكانش هنا جيت على جالك انا ...قفل الباب و حكمني من شعري ..قالي انا سيف الدين تبهدليني نتي يا بنت الكلب .....حاول يغتصبني و انا غير نبكي و نعيط ....مقدرتش نقاومو في لحظة مافهمتش وش صار هربت من عندو هزيت فازة كنت فوق الطابلة و ضربتو بيها ...ايه ضربتو بيها طاح بدمو من راسو يسيل ...بقيت داهشة نشوف معاه و ندعي في ربي ما يكونش مات ...فقدت وعيي و هذي اخر حاجة تفكرتها ....فطنت لقيت روحي في مركز البوليس متهمة بجريمة قتل ..ايه حصلت على تخفيض الحكم لانو كان دفاع عن النفس و الان راني نقضي في 10 سنين سجن الحكم تاعي ....هاد القصة حقيقية بشهادة احدى المسجونات لي كانت تقضي عقوبة 6 اشهر ...تقول ان المدعوة احلام.ع كانت تحكي حكايتها لكل مسجونة تتلاقى بيها بنفس التفصيل الممل هو الشي لي خلا المسجونات يرتعبو منها و يتحاشاو الكلام معاها ....رفيقتها بعد خروجها من السجن قررت باه هي. تعاود تحكي قصة احلام ...لي يقال انها ماتت منتحرة في السجن

نهاية قصة 3