* يَا نَفْسِي تُوبِي* كاملة
11-06-2016, 11:29 PM
* يَا نَفْسِي تُوبِي*
يَا الأمَّارَا بِسُوءْ الفَعَالْ خَافِي مَنْ رَبِّي *يَا نَفْسِي تُوبِي * رَاكِي عَبِّتِيلِي مِنَ الوَزَارْ شِئ لاَ يَتْعَبَّا
وَانَا طَاوَعْتَكْ وَ اسْمَعْتْلَكْ كِي رَايِي زَغْبِي *يَا نَفْسِي تُوبِي * جَرِّيتِينِي لَلْفَعْلْ الذَّمِيمْ وَ تْرَكْتْ التُّوبَة
تَبَّعْتْ رَايَكْ وَ انْتِ خايْنَا مِنَ الكَافْ اتْدَرْبِي *يَا نَفْسِي تُوبِي * مَنْ كُثْرَتْ حْمَاقِي ثَقْتْ فِيكْ وَانْتِ لَعَّابَة
حَتَى الجُوَارَحْ امْشَاوْ مْعَاكْ فِي مَا تَطَّلْبِي *يَا نَفْسِي تُوبِي * وَقْفُوا فِي صَفَّكْ مَتْضَامْنِينْ لَبَّاوْ الرَّغْبَة
وَذْنِي تَبْغِي تَسْمَعْ لَلْكْلاَمْ فَاحَشْ فِي الغَيْبِي*يَا نَفْسِي تُوبِي * عِينِي تَبْغِي تَنْظَرْ لَلْحَرَامْ رَاهِي مَجْلُوبَة
وَ اللِّسَانْ قَاطَعْ كِلْمَنْشَارْ حَتَّى فِي احْبَابِي *يَا نَفْسِي تُوبِي * يَتْكَلَّمْ فِي عْيُوبْ النَّاسْ بُوهْتَانْ وَ غِيبَة
* خمَاسة*
انَا بَالله حَبِّيتْ انْتُوبْ لْقَابَلْ التُّوبِي *يَا نَفْسِي تُوبِي*انْوَادَعْ اللَّهْوْوَنَتْرَكْ المِزَاحْ مَنْ هَذْ النُّبَة
صَرْتْ لاَهِي بَعْيُوبْ الغِيرْ وَ انْسِيتْ عْيُوبِي*يَا نَفْسِي تُوبِي * بَانْلَكْ فَعْلْ النَاسْ قْبِيحْ و انْتِ مَعْيُوبَة
الهَوَى و انْتِ و الشَّيْطَانْ تَبَّعْكُمْ قَلْبِي*يَا نَفْسِي تُوبِي * مَا قْدَرْ ايْقَاوَمْ طْرِيقْكُمْ اتْعَيِّي وَ صْعِيبَة
وَ ابْقِيتْ غِيرْ انْعَبِي وَ انْزِيدْ وَ اثْقَلْ ذْنُوبِي*يَا نَفْسِي تُوبِي * نَجْرِي وَرَاء المَلَذَّاتْ مَا خُفْتْ اعْقُوبَة مَا خَمَّمْتْ لْيُومْ ايْبَانْ فِيهْ كُلْ المَتْخَبِّي* يَا نَفْسِي تُوبِي* كُلْ مَا قَدَّمْتُو نَلْقَاهْ فِي صُحَفْ مَكْتُوبَة
يَا الله قُوِّينِي عْلَى النَّفْسْ نَبْلَغْ مَرْغُوبِي*يَا نَفْسِي تُوبِي* نَتْرَكْ المَعَاصِي وَ انْقُومْ بَاللِّي مُوجُوبَة
رانِي نَادَمْ عَنْ مَا فَاتْ فِي وَقْتْ اشْبُوبِي*يَا نَفْسِي تُوبِي* كَمْ مَنْ مُعْصِيَّة دَرْتْهَا رَاهِي مَحْسُوبَة
*خماسة *
انَا بَالله حَبِّيتْ نْتُوبْ لِقَابَلْ التُّوبِي* يَانَفْسِي تُوبِي*انْوَدَّعْ اللَّهْوْ وْنَتْرَكْ المِزَاحْ من هَذْالنُّوبَة
اشْحَالْ اجْرِيتْ فِي كُلْ جِيهْ وْفِي كُلْ دْرُوبِي * يَانَفْسِي تُوبِي *إلاَّ الطَّارِيقْ المسْتَقِيمْ ايْجِينِي عَقْبَة
يَامَا ضَيَّعْتْ مِنَ الوْقَاتْ فِي اللَّهْوْ وَ العُوبِي*يَا نَفْسِي تُوبِي*وَ انَا نَاسِي أنَّ المُوتْ مْنَ العُمْرْ قْرِيبَة
انْسِيت لِيلَةْ قَبْرِي وَ اسْألْ مَلاَيْكَتْ رَبِّي* يَا نَفْسِي تُوبِي*كِي يَحْظَرْ نَاكَرْ وَانكِيرْوَانْتِ مَرْعُوبَة إذَا اعْثَرْ السَانِي وَ اعْوَاجْ وَ غَابْ اجْوَابِي*يَا نَفْسِي تُوبِي *يَا الله ثَبَّتْنِي وَاشْرَحْ صَدْرِي لَلْإجَابَة
رَانِي خَايَفْ هَاذَاكْ النَّهَارْ وَاشْ رَاهْ مْخَبّي *يَا نَفْسِي تُوبِي*يُومْ انْ تَكُونْ الجُثَّة هَمْدَة مَمْدُودَة خَشْبَة ارْجِعِي لَصْوَابَكْ رَانِي شَخْتْ وَاكْسَانِي شِيبِي*يَا نَفْسِي تُوبِي*الزَّمَانْ عْلِيَّا وَ افْعَايْلَكْ وَ انْتِ مُوصِيبَة
*خمَاسة *
انَا بَالله حَبِّيتْ انتوبْ لِقَابَلْ التُّوبِي*يَا نَفْسِي تُوبِي*انْوَادَعْ اللهْوْ وْنَتْرَكْ المِزَاحْ مَنْ هَذْ النُّوبَة
قُلْتْلَكْ عِيبْ النَّاسْ اخْطِيهْ شُوفِي لَعْيُوبِي*يَا نَفْسِي تُوبِي *تَشْقَايْ فِي مَالاَ يَعْنِيكْ تَعْبْ بْلاَ سَبَّة أرْجَعِي لَلْمُولَى يَهْدِيكْ يَا الزَّايْدَة تَعْبِي*يَا نَفْسِي تُوبِي *تَرْبْحِي أجْرْ الأخِيرَة وْ فِي الدُّنْيَا هِيبَة
إذَا انْتَصَبْ المِيزَانْ يُومْ وُوقُوفْنَا لَلْحِسَابِي*يَا نَفْسِي تُوبِي *َاتْقَابَلْنِي لَفْعَالْ اللِّي دَرْتْ انْصِيبْهَا مَنْصُوبَة
يُومْ لاَ يَنْفَعْنِي لَامَالْ لاَ اوْلاَدِي مَنْ صُلْبِي*يَا نَفْسِي تُوبِي *يُومْ انْ تَجَفْ فِيهْ الأقْلاَم مَا تَبْقَى تُوبَة
يَا الله اغْفَرْلِي وَ اغْفَرْ لْأمِّي مَعَ أبِي*يَا نَفْسِي تُوبِي*وَ اوْلاَدِي وَاهْلِي وَ الجِيرَانْ وَ ذَاوِي القُرِبَة
الصَّلاةْ عَلَى مَنْ جَانًا شْفِيعْ مَصْبَاحْ اهْذَابِي*يَا نَفْسِي تُوبِي*وَالرِّضَاعَلَى لَنْصَارْ وَ الألْ وْكُلْ الصَّحَابَة
*خماسة*
انَا بَالله حَبِّيتْ انْتُوبْ لِقَابَلْ التُّبِي *يَا نَفْسِي تُوبِي*انْوَدَعْ اللَّهْوْ وَ نَتْرَكْ المِزَاحْ مَنْ هَذْ النُّوبَة
انْهِيتْ هَذَه الحُلَّة وَ اخْتْمْتْهَا تَمَّيتْ اخْطَابِي*يَا نَفْسِي تُوبِي *عَلَى النَّفْسْ الأمَّارَة بَالسُّؤْ عَاسَى تَتْرَبَّى
ادْعِيتْهَا قُدَّامْ اللِّي مَا ايْنَامْ قُلْتْ هُوَ حَسْبِي*يَا نَفْسِي تُوبِي* اللهُمَ فأشْهَدْ أنِّي بَلَّغْتْهَا وْ هِيَّا تَأبَى
يَا الله انْتَ العَالَمْ بْضَعْفْ حَالْتِي لِيكْ هُرُوبِي*يَا نَفْسِي تُوبِي* لُوْ مَا تَرحَمْنَا بَرْضَاكْ لاَ وِينْ الهَرْبَة
نَدْعِيكْ تْسَامَحْ يَارَحِيمْ جَاوَزْ عَنْ ذَنْبِي* يَا نَفْسِي تُوبِي*الطُفْ بْعْبَادَكْ عَنْدْ القَضَاء تَخَفْ المُصِيبَة
انتَ القَادَرْ وَ انَا العَبْدْ الظَّاعِيفْ وفِّيلِي طَلْبِي*يَا نَفْسِي تُوبِي*نَجِّي أمَةْ الإسْلاَمْ مَا يْشُوفُوا كُرْبَة
يَا الحَفَظْ لَوْ هَجِّيتْ الحُرُوفْ يَظْهَرْلَكْ نَسْبِي*يَا نَفْسِي توبِي* مِتِينْ و العَشْرَة وَ الثّْلاَثِينْ تَمَّتْ الحَسْبَة
