خير خوي
راك ناوي تحرق .....آفار...عرض خاص ولاول مرة ...جيب 2 ملايين برك والباقي كمله كي توصل....راك غالط .
اول مرة في حياتي ....نشوف واحد باغي يحرق ويبقي الناس على خير
مادخلتش راسي؟؟؟؟
المهم اذا كـــــان موضوعك هذا طرحته من اجل تشوف الناس الى تعزك ولا تبغيك
فانا نقولك: الناس مازال فيها الخير
وكيما قال الرسول عليه الصلاة والسلام
"لن ينقطع الخير من امتي الى يوم الدين"
اما اذا كان صح راك رايح تحرق ....وهاذي ما دخلتش راسي
فانا نقولك....كيما قالولي
"واش خليت وراك"؟؟؟؟
المهم قبل ما ندخلك ف الدومان تاع الحرقة....وقبل ما نسقسسيك واش درت ف الجزاير
نتمنى كي تقرى واش غادي نكتب
تجيبها ف الجامع وتصلي صلاة العصر
وتسقسي الامام في الشي الي راك دايره في راسك؟؟
الى ما طاحتلكش الدمعة.....صافي دير قلبك في مورسو تاع خبز وكوله....
سمحلي على الهدرة نتاعي ....ممكن تزعف ولا تتقلق منها...بصح نت الى راك فريمو حاب تحرق ....نقولك : سعدك...لقيت الي ينصحك
على خاطرش كاين ناس ما صابتش الي ينصحوها....نصهم مات...نصهم راه ف الميزيرية وحاجة قليلة راها عايشة لابال في.
المهم
حاب نسقسيك
آ س كو ....نويت باه تخدم في الجزاير رغم كل الظروف الي رانا نشوفوها؟؟
ولا راك من جماعة المنوض على 2 ...وكي تسقسيه ...علاه ما تخدمش...يقولك : الخدمة راها : رشوة ومعارف؟؟؟
"لا خير في رجل لا يجول"
خوي العزيز ...الخبزة ما تجيكش ونت قاعد عند الدار
دير تكلك في ربي وبوجي ...وكون متاكد بلي الانسان الي يسعى ...ربي يوفقوا.
راك حاب تطلع لاوروبا....واش عندك في جيبك؟؟
بطاقة التعريف الوطنية + سوفنير تفكرك بالانسانة الي كنت تحبها + صورة يماك وخوك الصغير
ولي عقلك
الناس راه عندها ...لاليسونس والماجستير ...مالقري مكانش الخدمة ...بصح جامي فكروا باه يحرقوا...والى خموا يحرقوا ...تجي عليهم خوي العزيز
قاري وما صابش الخدمة.
هنا ترجع لهدرة والديك كي كنت ف الليسي ولا ف السيام...قرى يا ولدي ...راك تلقى غير قرايتك.
ما عليش حنا ما قريناش...مكتوب...بصح ربي ما يبلع باب حتى يحل 10
عندي عمي الصغير ...طلع لالمانيا ف 77 ...داته قرايته الله يبارك
دخل للجزائر ف 81 ... حكم شركة وطنية ...والحمد لله راه متقاعد في يومنا هذا
كي تسقسيه على اوروبا
يقولك : اوروبا بكري ...مشي 2010
خوي العزيز
عندك خدمة شريفة في يديك؟؟
عندك ديبلوم من معهد ولا مركز تكوين؟؟
خدمت ف الدومان تاع التجارة ولا جامي؟؟
نحسن عونك الى تميزرت وراك حاب تحرق...هنا نتحيلك بصح كاينة حاجة خليتها وراك اذا حرقت....يماك خوي العزيز...الكبدة.
انا اعوذ بالله من قول انا....غروني كيما غروك ..."اوروبا دير فيها الشكارة"....واحد يقولك " نموتوا ف البحر ولا عيشة الكلاب" ولاخر يقولك " واش دارتنا دزاير" ...واحد داير الحرقة زهو و رجولية ويقولك " زهو الدنيا لا تبدله بشقى"....واحد غاراته بيام كوبرا...واحد غارته مارسدس كلاس "س".
الله يهدينا خوي العزيز
2006 خوي العزيز ...رفدت كابتي وقلت للشيبانية نتاعي راني هابط لوهران خدام...كان عندي 19 عام ...كذبت عليها...خاسر 2 ملايين باه نحرق
الرونديفو ...في وهران...والحرقة من بوزجار.."عين تموشنت"
خطراتش يسخرلك ربي ناس ما تعرفهاش تكون سبب باه تنجيك
بالصدفة نلقى واحد سكران عند لابلاج....واش قالي في ميزك:
راك رايح تندم يا ولدي
قتلو الحاج تعرفني ؟؟؟
قالي : راك ناوي تحرق؟؟
قتلوا : الحاج كرهنا الميزيرية في الجزاير؟؟
قالي : الى تميزرت نحسن عونك...بصح واش خليت من وراك؟؟
قتلوا الحاج ...دعوة الخير.
قالي : راك غالط...يماك بقيتها على خير؟؟؟
في ذيك اللحظة خوي الكريم : طاحت الدمعة ...حكمني في الجرح الي ما يبراش...
في ميزك نت اخي الكريم ...تكمل الحرقة ولا ترجع ليماك؟؟؟
ما نكذبش عليك...اثرت فيا هدرته ...والحمد لله الي ما حرقتش
واحد من صحابي
قالي : نت جايح ....قتلوا : سميني كيما تبغي...نعيش مع والدي بالخبز والما ...وما نروحش ودمعتها تسيل ليل ونهار.
الحمد لله خسرت 2 ملايين كنت دافعهم لافونس...وما طيحتش الدمعة للوالدين.
المهم الشبيبة قلعت ....مغلبهم وصل ..و 2 من الناس ...دايم الله في ملكه...الله يرحمهم.
الحمد لله من خدمة الحجرة والبناء مع احد الجيران...فتح علينا ربي انا وصاحبي وحلينا طاكسي فون...ومنه لنقطة بيع معتمدة....وتوجور داير في بالي بلي لي يتحرك يرزقوا ربي....
افريل 2008 ...8 جثث تصل الى مدينة تيارت ...حراقة وماتوا ...ربي يرحمهم
جنازة رهيبة...ومظاهرات سلمية وسط المدينة....في حين شهدت احياء اخرى مشادات مع الامن الوطني اعتراضا على المعيشة الي راهم عايشينها.
نعرف واحد من الحراقة الثمانية الي ماتو...كنت كي نلقى يماه
تبكي خوي العزيز....تقولي : تفكرني بوليدي
خوي العزيز
مال الدنيا لا يساوي شيئا امام دموع تلك المراة.
في احد ردودك اخي الكريم على احدى الفتيات
قالتلك : انا ما نخليش بلادي
انت قلت لها : راكي تهدري في ذيك الهدرة على خاطرش عندكم المال
يا اخي الكريم
مشكلتنا نحن الشباب مشي الاورو ولا الدينار
مشكلتنا رانا بعاد على ربي ....خاف ربي تشوف العجب
خوي العزيز
خدمت عند الناس ب 200 دج لليوم ؟؟
خدمت الطريق والسوق..تتسوق العلمة وتجيب كوتا تاع ليموبيل ...والديوانة يقولولك : ندوا النصف ولا نسيزو السلعة كومبلي؟؟
نديرلك حاجة في بالك
الى متى يصرف عليك الشيباني نتاعك؟؟
الوالدين ما يدومولكش ..بصح حاول تكون كبير في نظرهم
بينلهم بلي راك قد المسؤولية.
راك تقول الحقرة في بلادنا...بصح صبر اخي الكريم
"روح بيع الفول تشوف الحقرة" بصح الله غالب لازم تصبر باه تنال
حط صندوق تاع بطاطا ولا فول ...نصف تبيعه ونصف تقيسهلك الحكومة وسط الطريق...لازم تصبر.
راح تقولي
لم استطع ان اصبر
واش نقولك...
شوف ف الجزيرة...خوتنا في غزة يموتوا بالجوع ...وصابرين.
وين رانا حنا من هاذوا؟؟؟
اتقي الله اخي الكريم في نفسك
والى راح تقولي بلي راك شبعان دراهم
نقولك حاجة
هبط لحاسي مسعود وتشوف بعينك الناس واش راه صاريلها
من وهران ..من عنابة...من سعيدة...من البليدة
راهم جايين يحوسوا على الخدمة.
نعطيك مثال على روحي : كنت قادر نريح في ولايتي ونخدم ليبورتابل ...بصح اخي الكريم ...ماهيش دايمة.
رانا في 4 ايام نقارعوا لشركة سباس دير فينا خير وتخدمنا ...والحمد لله التالي فينا ما كفرش وقالك نعل بوها دزاير.
مهما كان بلادي ...والناس الي راها تخون وتختلس في اموال الدولة ومضيعة الشبيبة ...ربي يهديها....وكلها ويعطيه ربي على حساب نيته.
الله يهدينا ويهديك اخي الكريم وتوجور حط قدامك
اوروبا هل تساوي دموع الام ؟؟