لله آشْ رَاء
30-01-2017, 10:43 PM
اطْغَى وْهَاضْ وَجْدِي وَ انْضَرْمَتْ نَارْ فِي اكْبَادِي**** مَنْ شُوقْ مَنْ هَوِيتُه عَقْلِي دِيمَا هْمِيمْ شَارَدْ
فِي دَاخْلْ الحَشَاء سَيَّبْلِي مَشْهَابْ رَاهْ قَادِي **** مَا تَطْفِيهْ الأمْطَارْ وَ لاَ السَّقِيعْ جَامَدْ إلاَّ إذَا اوْفَى مَرْغُوبِي وَ امْشِيتْ لِيهْ غَادِي **** وَانْشَاهَدْ مْقَامْ مَنْ جَاء بَالرَّحْمَة دَلِيلْ رَاشَدْ
ثَمَّا انْقُولْ صَبْتْ مُنَايَا بُشْرَة ازْيَانْ سَعْدِي**** بَزْيَارَتْ الحَبِيبْ المُجْتَبَى سِيدْ كُلْ سِيَّدْ
مَنْ صَلَّى عَلِيهْ المُولَى صَلاَةْ بِلاَ اعْدَادِي**** وَ الرِّضَا عَلَى اصْحَابُه الكْرَامْ وَ الأهْلْ وَ الحْفَايَدْ مُدَّة اشْحَالْ وَ انَا نَرْجَى مَكْتُوبِي ايْنَادِي**** وَ نَمْشِي مَعَ الحُجَّاجْ جَمَاعَة فِي رَكْبْ وَاحدْ
وَ انْوَادَعْ الحْبَابْ وَ اهْلِي وْ جِيرَانِي مْعَ اولاَدِي**** وَ انْسِيرْ كَانْ سَهَّلِي رَبِّي بَالمَسِيرْ لاحْمَدْ وَ انْشُوفْ رُوضْتُه مَعَ قَبْرُه طَهَ ضِيَّا اثْمَادِي**** يَهْنَا خَاطْرِي بالزُّورَة وْ يَزْهَا الدَّلِيلْ يَسْعَدْ
لله آشْ رَاء مَنْ لاَ رَاء طِيبَة يَا اسْيَادِي**** وَ رُوضَةْ الأمِينْ الصَّدَقْ طَهَ الزَّكِي المَاجَدْ
تَكْلِي عَلِيهْ وْ دَرْتْ إمَانِي بِيهْ زَادِي **** عَاسَى انَّالْ زُورَة وَ يَتْفَاجَا سَاكْنِي النَّكَدْ
يَا الله جِيتَكْ بَجْمِيعْ الصّلَّاحْ وَ العُبَّادِي **** وَ العشْرَة الأقْطَابْ وَ مَنْ حَضْرُوا يُومْ أُحُدْ البُعْدْ كَادْنِي وْ لاَلِي قُوَّة وَ لاَ حُولْ عَنْدِي**** إلاَّ افْضَالْ رَبِي إذَا حَضْرَتْ مَا يْرَدْهَا حَدْ
تَكْلِي عْلِيكْ رَبِّي تَطْفِي ذَالنَّارْ مَنْ اكْبَادِي**** بَزْيَارَتْ بِيتَكْ يَطْفَى لَهِيبْ كَانْ وَاقَدْ
لاَ تْخَيَّبْ رَجَاء مَنْ جَاكْ يَا الهَادِي**** سَهَّللِّي بَزْيَارَةْ خِيرْ الوَرَى المَاجَدْ
الحُجَاجْ سَارُوا وَ غِيرْ انَا بْقِيتْ وَحْدِي**** لاَ رَفِيقْ لَقِيتُه فِي ذِيقْتِي ايْسَاعَدْ
لاَ مَالْ عَنْدِي فِي وَقْتْ الشَّدَة بِيهْ نَفْدِي **** وَ المَالْ يَصْلَحْ فِي سَاعَةْ الذِيقْ الشّْدَايَدْ
وَ لاَ لِيَا طَاقَة وَ الحَمْلْ اثْقِيلْ فُوقِ جَهْدِي **** وَ لِيامْ انْعَكْسَتْ وَ السَّعْدْ جَاء امْسُوَّدْ
لله أشْ رَاء مَنْ لاَ رَاء طِيبَة يَا اسْيَادِي**** وَ رُوضَةْ الأمِينْ الصّادَقْ طَهَ الزَّكِي المَاجَدْ
سَهَّلْ يَا الله يَتْفَاجَى كَرْبِي مَعَ انْكَادِي**** يَا سَامَعْ الدُّعَاء وَفِّيلِي طْلُبِي مَعَ المَقَاصَدْ
نَمْشِي انْزُورْ مَنْ مَلْكَتْ عَقْلِي وَ حَارْقَة اكْبَادِي**** مَكَّة وَ بِيتْ رَبِّي وَ انْقَبَّلْ الحَجْرْ الأْسْوَدْ
نُقْصَدْ بِيرْ زَمْزَمْ نَرْوَاهْ دَوَى ايْطُبْ جَسْدِي**** قَالْ طَهَ زَمْزْمْ لِمَا انْوَا القَاصَدْ
وَ انَا مَعَ الصُّفُوفْ انْهَلَّلْ وَ ابْصُوتِي انَّادِي**** لَبَّيْكْ اللَّهمَ لَبَّيْكْ يَا الوَاحَدْ
وَ انْقُومْ بَالفَرَايَضْ كِيمَا قَامُوا اسْيَادِي **** اسْلاَفْنَا اهْلْ الله الصَّلِحِينْ ثُمَ نَسْعَدْ
نَحْرَمْ وَ انْطُوفْ وْ نَسْعَى سَبْعْ اشْوَاطْ فَرْدِي **** وَ نَطْلَعْ لجْبَلْ عَرَافَة وَ نَدْعِي الغَنِي الوَاحَدْ
مَنْ ثَمْ لَلْمُزْدَلِفَة مَعَ الجُمُوعْ نَغْدِي **** وَ انْكَثَّرْ الصَّلاَةْ عَلَى مَن جَانَا دَلِيلْ رَاشَدْ
وَ طُوَافْ الإفَاضَة وَ انْلَقَطْ لَلْلَّعِينْ بِيدِي **** حَجْرَاتْ بَيهُم نَرْجَمْ الشَّيطَان اللّعِين المَارَدْ
لله آشْ رَاء مَنْ لاَ رَاء طِيبَة يَا اسْيَادِي**** وَرُوضَةْ الأمِين الصَّادَقْ طَهَ الزَّكِي المَاجَدْ
قَبْلْ الغُرُوبْ نُوصَلْ مِنَى بَحْمُولْتِي وْ زَدِي**** وَ انْحَطْ الرّْحَالْ فِيهَا وَ انْوَجَّدْ المْبَاتْ لَلْغَدْ
انَا دَرْتْ تَكْلِي وَ ارْجَايَا فِيكْ وَ اعْتِمَادِي**** نَدْعِيكْ لاَ اتْخَيَّبْنِي يَا مُوجِيبْ كُلْ قَاصَدْ
يَا سَامْعْ الدّْعَاء يَا عَالَمْ بَاللِّي اخْفَى اوْ بَادِي**** بَجْمِيعْ مَا اخْفِيتْ و دَسِّيتْ انْتَ ارْقِيبْ شَاهَدْ
إذَا اسْهِيتْ وَاعْصِيتْ انْتَ الرَّبْ الغَفُورْ تَهْدِي**** إذَا اقْضِيتْ امْرَكْ تتْقُولُو كُونْ ايْكُونْ وَاجَد
خَايَفْ مَنْ ذُنُوبِي وَ مَا فَعَلْتْ مَنْ فَعْلْ رَادِي**** يُومْ الحِسَابْ تَحْظَرْ الافْعَلْ اقْبَالْتِي وَ تشْهَد
نَدْعِيكْ يَا الله اتْحَرَّرْلِي مِنَ النَّارْ جَسْدِي**** نَبْغِي مَنْزَلِي ايْكُونْ فِي جَنَانَكْ الوَسِيعْ نَخْلَدْ
وَ اغْفَرْ لأمِي مَعَ بُويَا وْ خَاوْتِي مَعَ اوْلاَدِي**** وَ المُومْنِينْ جَمْلَة تَرْحَمْهُمْ مَا اتْسِيبْ واحَدْ
مِيتِينْ زِيدْ عَشْرَة وَ نَصْفْ البَاء مِنَ العْدَادِي**** الصَّادْ جِيبْ نَصْفُه يَدْرِيهْ مَنْ هُو لْبِيبْ رَاشَدْ ثْنِينْ وَ تَسْعِينْ يَظْهَرْ اسْمِي لَكْ بَادِي**** مُوضُوحْ لَلْوَرَى مَا نَكْرُه إلاَّ اللَّئِيمْ جَاحَدْ
بَالصّلاَةْ وَ السَّلاَمْ عَلَى المُصْطَفَى خَتَمْتْ نَشْدِي**** مَا دُمْتْ حَيْ نَمَّدْحُه حَتَّى نَمُوتْ نَنْشَدْ
لله آشْ رَاء مَنْ لاَ رَاء طِيبَة يَا اسْيَادِي**** وَرُضْةْ الأمِينْ الصَّدَقْ طَهَ الزَّكِي المَاجَدْ
تمت بفضل الله *محمد ريّالْ*
