تسجيل الدخول

السلام عليكم
كي شفت طلب الخت سرين قلت أنا تاني نطلب
أتمنى أن ترشدني إحدى الأخوات عن كيفية تحضير خبز المطلوع أو خبز خمير كما يسميه البعض لكن على شرط أنوا يكون هداك لي من نوع المنفوخ الوسط و كأنه فارغ و كي تفتحوا تشوف داخل البابة كأنها خيوط براقة شحال بنيني أنا كي نحضروا تجي البابة فيه مدكسة علما أني نطيبوا فوق النار تاع الكويزينيار في طاجين حديد.
أرجوا أنوا يكون طلبي مفهوم .
و قد كنت طرحت هذا الطلب في إحدى مشاركاتي لإحدى المواضيع http://montada.echoroukonline.com/sh...d.php?t=218998


تحياتي للجميع شكرا . مسبقا
بـــــــــــــــــــارك الله فيكم.

انا كدلك اريد اعرف المقادير وطريقة العمل اجربها بس ما مكون مثل ماقلت قالو لى يعملوه بس بالفرينة ويتركوه يتخمر وبعاودو يعجنوه ويتركوه يتحمر وبعد يطبحوه فى الفرن والله اعلم

بارك الله فيك على المرور أختي
لكن اظن أن الخبز الذي شفتوا و أكلتو مصنوع من السميد ربما يضيفوا كمية من الفرينة و لكنوا ليس بالفرينة وحدها و حتى ان ا نعجنوا و نخليه يخمر و من بعد مقرصوا و نشكل خبزات و نخليه يخمر و نطيبوا على الطاجين
صح أنا تاني سمعت أنوا يطيبوه في فرن خاص .
شكرا لك بارك الله فيك أختي نسمة.

شريكتي و الله و الله و الله هذا وين كملت طياب الكسرة بصح في طاجين الفخار و على الطابونة
اعطيني وقت نفطر العيال و نرجع نكتبلك الوصفة بالتفصيل الممل و راح عمو القبي يحبببببببببك بجنوووووووووووووون على فكرة الكسرة اللي نخدمها تقول قطن

انتظريني راني نكتب و الحبة نتاع البصل في يدي راني في المطبخ

رائحة اللاب توب راهي غي ثوم و بصل

كاش نهار ينطق و يقولي

كرهتييييييييييييلي حياتي بهذه الروائح المقرفة

شريكتي من بعد الواحدة نرجع

الله يسعد أيامك
بــــارك الله فيك
نجي نفطر عندك و احسبيني واحدة من عيالك يا خالتو
ربي يحفظك طاطا أم هديل
أنا في الانتظار ما شاء الله كل صبع بصنعة و انا قلت عليك بيت حيدرة و تعرف غير لي بانيني و لي ساندويتش أرجوك إسمحلي يا خالتو
ولا حبيتي نعيطلك يا جدتي الحنون












رانــــــــــــــــــــــــــــي نتمسخر معاك يا أمورة علابالي لي مازالكي على ديدانك :
"بحيطان أربعا وعشرين" كيما يقولوا خاوتنا السوريين .
تحياتي
أختي شريكتي أم هدييييييلوووووووووووووو
صـح فطوركم و بصّحة و راحة و الله يخلف كيما يقولوا خاوتنا المراركة .
على فكرة اللهجات متنوعة و كلها ممتعة و حلوة.
سلملي على العيال الكتاكيت وعلى الابتوب المسكين

ام اميمة اخلعتيني كي قلتيلي طاطا و خالتي قلبي احبس

المهم هناك 3 شروط لنجاح الكسرة او المطلوع او خبز الخميرة

اولا لازم يكون السميد و الفرينة من النوع الجيد كيما نقولو احنا فيهم العلك

انا نستعمل سميد القمح
والدتي ربي يحفظها غسلت القمح و بعثتلي السميد

ثاني شرط هو الطاجين لااااااااازم يكون فخار

ثالث شرط هو الدليك و اليدين الصحاح يعني كي شغل راكي تلعبي في الاوربتراك

رياضة

ندخل في التفاصيل

اولا خذي عبار سميد ممتاز و زوج عبارات فرينة شخصيا استعمل الحمامة و ملعقة خمارة خبز و تكوني موجدة الخميرة في الليل

(تخلطي شوية سميد مع قرصة ملح و الماء الدافئ و تخليها تخمر طول الليل)

تخلطي كل المقادير بالماء الدافئ و تولي تدلكي مليح يعني تكون العجينة شوية يابسة

تدلكي حوالي 10 دقائق يعني تحرقي 500 كالوري و كي تاكلي خبزة ترجعي الدوبل
من بعد تزيدي الملح و كل مرة تزيدي الماء الدافئ حتى تتحصلي على عجينة طرية

من بعد تقرصيها و تخليها تخمر انا استعمل السلات نتوع الحلفة الكسرة تخمر فيهم رووووووعة

و كي تخمر يعني يتضاعف حجمها طيبيها على الطابونة ماشي الكويزنيار

و انا كي نولي ندلك فيها اضيف ملعقة حبة الطيبة و ملعقة سانوج و نكون راحيتهم نص رحية يعني مدشين و الله رائحة الكسرة تشميها من برة
انا ضوك نروح ندير قيلولتي و الله راني ميتة بالنعاس نسهر و نزيد نوض على السادسة اي استفسار انا هنا

السلام عليكم .
.
.
.
.
.
.
اختي ام هديل كفات و وفات .
.
.
.

انا كيفك نطيب فوق الكويزينيار في طاجين الحديد
--نستعمل السميد وحده يكون لونه اصفر ماشي رطب يعني كي تتحسيه بيديك يجيك حرش ششوية ركزي على شوية السميد الاصفر حنا عادة هو اللي نفتلوا بيه الطعام .....
--انا نعبر بالغرفية يعني كل غرفية تصنعلي خبزة
--استعمل الخمارة تاع البودر الرقيقة ماشي (الغليظة تاع الميزان) نعبر بالملعقة تاع القهوة في كل ثلاث خبزات ندير مغرف وحدة لأني نتحسس ريحة الخمارة في الخبز
--نحط السميد في القصعة و نزيدلها الخمارة (تقدري تضيفي السانوج و حبة الحلاوة) نخلط مليح ثم نضيف الماء لازم يكون دافي يعني فاتر و لمي العجين ما تكثريش الماء ديري شوية شوية كي تلمي العجين
ادلكي ادلكي تحسي العجينة يابسة بصح ادلكي و ادلكي و ادلكي(ادلكي بكفك ) و هكذا بصح لازم تكوني خفيفة في الدليك على خاطر قادرة تتخمير في يدك و تضيع فايدة الدليك ثم ديري الماء شوية و ادلكي و شوية و عاودي ادلكي ثم
ضعي الملح في القصعة ديري عليه شوية ماء ثم حطي فيه العجينة و ادلكي لاخر مرة كي تحسي العجين شرب كل الماء هزي العجينة و ديري شوية فرينة في القصعة و حطي العجينة تسهلك عملية التقراص
قرصي الخبيزات على حساب العبر الاول اللي درتيه
ثم حلي بالوحدة استعملي اصابع يدك فقط و سمسلي بالفرينة
حطيها فوق الطرشونة او المنديل الخاص بالخبز و غطيها ثم ضعي الاخرة فوقها و هكذا .....
حطيها في مكان يكون دافي باش تطلع بالخف
.
.
.
.
.
اغسلي قصعتك و ديري فنجال قهوة ربعي راسك و قارعيلها تطلع .
.
.
.

كيفاش تعرفيها طلعت ؟؟؟
اذا شفتيها اتنفخت و لا شفتي حبات بيوضا من الفوق
سخني طاجينك و حطي خبزتك و عسيها و قلبيها .....الكويزينيار تكره في الطياب
حوشيها و حطيها في سلة الحبز و غطيها بالمنديل باش تبقى طرية
.
.
.
.
اذا خرجتلك شابة قوليلي و اذا ماشي شابة اعرفي بلي لافوت فيك انا خاطيني

السلام عليكم
بارك الله فيكما على الشرح الوافي و الكافي
ما عندي ما نخسر إن شاء الله نجربهم في 2 و نردلكم الخبر مرفقة بالصور و انتم كي ديرهم مرة ثانية حطوا الصور أو إدا عنكم بقايا من الخبز صوروهم و حطونا في المنتدى .


شكــــــــــــــــــــــــــــــــــــرا لكما
أتعبتكما معي
ربي يجازيكم .
و إدا ما طلعليش مليح يا ويلي نمسح الموس في روحي.
تحياتي

الأولى : ما نضمنلكش حنا كل مرة كيف يخرجلك السميد كي تشريه شغل كيندر سوربرايز
نشفى في شهر سبتمبر شرالي سميد واش نقولك كارثة حبيت ندير بيه معارك في الحقيقة السميد هو لي عركني هداك النهار . و كرهلي أصل العجين حتى قريب بكيت جامي صراتلي في حياتي.. مالفة سميد ديفوا مايخرجش مليح مي ينجاز يتعرك و نحل المعارك و نطيبهم لكن هداك النهار أنا خضت معركة كنت خاسرة فيها في النهاية .لكن
الحمد لله .
الثانية : هادي أوبسيون لازم تشكري ربي عليها صباح و عشية ربي يحفظهالك و يجعلك تبري بيها آآآآآآآآآآآآآآآآآمين .


شكرا أختي أم هديلو مرة اخرى.
ربي يجازيك

http://montada.echoroukonline.com/sh...d.php?t=220004
تم تلبية طلبك وبالصور ايضا
ربي معاك فالتطبيق