هَذِه الدُنْيَا الفَانْيَا فِيهَا حِكَايَاتْ ****
25-08-2017, 12:09 AM
هَذِه الدُنْيَا الفَانْيَا فِيهَا حِكَايَاتْ **** وْ فِيهَا هْمُومْ كُثْرَا مَا يَنْحَمْلُوا
تَارَة شَهْدَة صَافِيَة فِيهَا نَشْوَاتْ **** وْ تَارَة حَنْضَلْ مُرْ لاَ مَنْ يقْدَرْلُه
مَا فِيهَاشْ أمَانْ تْبَدَّلْ الصِّيفَاتْ **** كَمْ مَنْ غُرِّي ابْكَى بَعْدْ انْ ضَحْكَتْلُه
مَا دَامَتْ عَلَى حَالْهَا عَنْدَهَا قَلْبَاتْ **** مَنْ زَهَّاتُه اليُومْ غَدْوَى تَخَّذْلُه
كَمْ مَنْ وَاحَدْ لاَحْتُه فِي ضُلُمَاتْ **** وْ طَفَّاتْلُه المَصْبَاحْ بَعْدْ انْ شَعْلَتْلُه
كَم مَنْ شَعْلَتْلُه الشَّمْعَة لِيهْ اضْوَاتْ **** مَتْهَنِّي فِي مْعِيشْتُه كِيفْ اهْوَالُه
وَ كَمْ مَنْ اغْنَاتُه وَ اعْطَاتُه الخَيْرَاتْ **** شَغْلاَتُه بِيهَا حَتَّى افْسَدْ حَالُه
وْ كَم مَنْ مَسْكِينْ يَتْقُوَّتْ بَالْفْتَاتْ **** حَتَّى اللُّقْمَة اليَبْسَة مَا صَحَّتْلُه
وَ الاخُرْ مِنَ الأكْلْ مْرضْ بَالتَّخْمَاتْ **** يَاكُلْ كِالْمَجْنُونْ حَتَّى شَرْقَتْلُه
وْ وَاحَدْ ابْنَى وْ عَلاَّ عِمَرَاتْ **** وَ حْدَايَقْ وَ قْصُورْ كِيمَا يَحْلاَلُه
وْ لَاخُرْ مَاهُوشْ لَاقِي وِينْ ايْبَاتْ **** وْ وَاحَدْ عَالحَرِيرْ راقَدْ ابْنَعْلُه
وَاحَدْ مَنْ يُومْ زَادْ شَاقِي حَتَّى مَاتْ **** وْ هُوَ يَجْرِي وَراء الخُبْزَة صَعْبَتْلُه
وْ الاخُرْ يْسَاعَفْ فِيهَا كِيمَا جَاتْ **** عَايَشْ بالأحْلاَمْ وَ امْرِيَّحْ بَالُه
وَلاَخُرْ عَايَشْ فِي الحَيَاةْ بِلاَ حَيَاةْ **** كَارَهْ رُوحُه وَ المَعِيشَة اسْمَاطَتْلُه
وَاحَدْ لاَ جَهْدْ لاَ قُوَّة فِي الذَّاتْ **** ايْعَدِّي فِي المَكْتُوبْ و يَسْتَنَّا اجْلُه
يَتْعَذَّبْ يَامَا اعْطَاتُه مَنْ ظَرْبَاتْ **** امْطَيْحَاتُه وْ إذَا انْوَى ايْقُومْ اتْعَاوَدْلُه
وْ وَاحَدْ عَمْرُه مَا ذَاقْ الشَّدَاتْ **** مَا يَعْرَفْ عَالحُوجْ إلاَّ مَا قَالُوا
وْ الَاخُرْ اتْرَاكْمُوا عَلِيهْ الكِيَّاتْ **** ايْعَالَجْ كِيَّة لُخْرَا تَهْدَفْلُه
وَ الاخُرْ قَصَّتُه اتْشَابَهْ الرِّوَايَاتْ **** ايْشَفْ العَدْيَانْ مَنْ مَا يَجْرَالُه
زَهَّاتُه وَ اضْوَاتْلُه مَنْ بَعْد اطْفَاتْ **** حَاوَلْ يَفْهَمْ وَاشْ صَارِي تَلْفَتْلُه
يَا دُنْيَا وَعْلاَشْ تَلْعَبِي ذْ اللَّعْبَاتْ **** وَاحَدْ مَا اتْرَكْتِيهْ هَانِي فِي حَالُه
طَلَّعْتِي الارْذَالْ عَلَى ظُهُورْ السَّدَاتْ **** وَ اشْعَلْتِي لَلْكَلْبْ الشَّمْعَة فِي ذِيلُه
دَرْتِي شَانْ لَلِّي مَا عَرْفُوا خَصْلاتْ **** يَعَّبْدُوا فِي العَبْدْ إذَا اكْثَرْ مَالُو امْعَانَا عَايْشِينْ وَ قْلُوبْهُمْ امْوَاتْ ****مَا ايْغِيرُوا عَلَى عَرْضْهُمْ مَا يَخَّجْلُوا نَطْلُبْ السَّامِيعْ المُوجِيبْ الدَّعْوَاتْ ****ايْنَجِّينَا مَنْ هُمُومْ الوَقْتْ وَ اهْوَالُه مِنَ العُسْرِ لَلْيُسْرْ تَتْبَدَّلْ الاوْقَاتْ ****وْ يَمَاتْ السُّرُورْ و الزَّهْوْ ايْهَلُّوا
وَ ايْزولْ النَّكْدْ وَ الغُبَنْ بَعْدْ الشَّدَاتْ ****وَ ايْجِي عَوضْ المُرْ الشَّهْد ابْعَسْلُو
يَا العَالَمْ اسْرَارْ كُلْ المَخْلُوقَاتْ **** عَبْدَكْ الظَّعِيفْ تَلْطَفْ بْحَالُه
اعْيِيتْ انْكَابَرْ يَا الله الرُّوحْ اعْيَاتْ **** لاَ اتْحَمَّلْنِي فُوقْ مَا نَقْدَرْ حَمْلُه
وَ اهْدِينِي لَلصَّلاَحْ يَا غَافَرْ السِيَّاتْ **** بِجَاهْ مَا فِي الكْتَابْ طَلْبِي تَقَّبْلُه
وَ ارْحَمْنِي وَ ارْحَمْ سَامَعْ ذَالأبْيَاتْ **** و جَاوَزْ عَلَى ذُنُوبْ بُويَا وَ اغْفَرْلُه
وَ اجْعَلْ أُمِي فِي جَنَانْ الحُورِيَّاتْ**** يَا مَنْ وَاعَدْتْ مَنْ دَعَاكْ تَسْتَجَبْلُه وَ اغْفَرْلُه لْرِيَّال امْعَاصِيهْ و الزَلاَّتْ **** و جَاوَزْ عَلى اخْطَاهْ وَ امْسَحْهُمْ لُه
تمت. محمد ريال .
