اواه اواه اواه يا الزمان تلفتلي الرابعة من السبوع عمرتلي قلبي بالمحان وضاق القلب ضيقوه الضلوع كل ما نقول الطريق راه بان تسبقني وتضرب القطوع نتبسم مرة في الزمان وتمسحلي البسمة بالدموع و اواه اواه اواه يا الزمان فاتو السنين كي سهم البراق كنت صغير والصغر ما يدوم زمان الشمس الدفا والشراق القمر مونس بالنجوم بدلت النية بالنفاق ورد الجنان سقيتو سموم عريت شجارو من الوراق وطلست الفرحة بالحموم و اواه اواه اواه يا الزمان علاش يا زمان ماراكش كي زمان عاد الخو مع خاوتو غريب شاب الراس ورابو السنان كيف لي عندو قلب ما يطيب قساحو القلوب لي كانو حنان خاب ظني ومعلوم كايخيب خلطت الصفات والالوان ماعرفت وين المريض من الطبيب و اواه اواه اواه يا الزمان يا سايلني على الزمان غير هنيني تعاديت معاه وكان من حقي نعاديه جراني بحيلتو كي عييت رماني وحلفت بالله كيما رماني نرميه زمان زمان كان الزمان زماني واليوم الزمان دار وتبدلو ماليه اعطيتلو الدنيا وقلتلو بركاني وخليتلو جرحي بالاك يداويه تمشيت مع الزمان مسلح بصغري وشايف الدنيا بعقلية الصغر اذا حبس نحبس وادا جرى نجري تاكل على الحباب ما نخافش كي نعثر وبدات اليامات تبيض في شعري وبدى السلاح يرشى والزهر يتبحر لحبيب ولا عدو يقطع في ظهري مصعب الضربة اذا جات في الظهر و اواه اواه اواه يا الزمان اذا تعاداو الناس كانو يجو لعندي وما يهناش خاطري حتى يتخاوو نرسم البسمة والدمعة في خدي هات برك نرضي القلوب لي قاسو وبديت فليامات نصيب روحي وحدي حباب البارح راحو خلاص نساو عود الزمان جراي ماهوش كي عودي الزاولي كبر وصفاحيه رشاو و اواه اواه اواه يا الزمان تبعت النية والنية داتني وارماتني في الهم لي راني فيه يسلم يعنق في بالي يحبني واللي في قلبو ربي عالم بيه قهرتني الدنيا بصح علمتني قبل ما نأمن عبد نميز في عينيه لي جرب لمحان لابد يفهمني واللي ماجرب ماكان لوم عليه اواه اواه اواه يا زمان تلفتلي الرابعة من السبوع عمرتلي قلبي بالمحان ضاق القلب ضيقوه الضلوع كل ما نقول الطريق راه بان تسبقني وتضرب القطوع نتبسم مرة في الزمان وتمسحلي البسمة بالدموع واواه اواه يا زمان
قصيدة لوابد ياسين
