تسجيل الدخول

السلام عليكم
تعالوا معي إلى جولة عبر ظروف االأعضاء وأجواء المنتدى في بداياته.

سنين عدّيتها منتديــــــــــات
كليمتين ونزيد فيـــــــــــــها

هذا ساعـة لاخـــر نـهارات
الحصول ما نقدر نحصيـها

لكـــن جات هنا وفـــــرات
الشروق ما بقيت نخطيــها

صح، نغيب عنها ساعـات
بسباب نقــــدر نحكيـــــها

مرة يقصوا عني النّــــات
600دينار نعجز عليــها

ومرّة ترجع سلحفـــــــــاة
بالسّيف تبدّل أخطاويـــها

ومرّة تاكلني الفيروســات
بوجادي عاجز نلغيــــــها

ومرّة ندخل في سبــــــات
نهجر الثقافة ومّاليــــــــها

ومرّة تركبني نشعــــــات
نقول الشروق نخطيــــها

لكن ، نبعد عليها هيهات
ندور ندور ونولّي ليــها

محال نترك الغاغــــات
وكلمتي لازم نرميـــــها

لو كان ندّي عليها سبّات
يصعب علي نخبّيــــــها

الا بالحجّة والإثبــــــات
جاهز في لحظة نمحيـها

لعمى، نكره الجماعـــات
والمذاهب من بكري لاغيها

لاني وهّابي ولاني شيّــات
مسلم، بلادي فقلبي حاضيها

الله على ذيك الهجمــــات
كانت تجيني من كل جهة

أطنان تنزل الصفحـــات
الشيخ(غوغل) مهيّيـــها

نسخ، لصق، وقفـــــالات
عبّز تفـــوت القاريـــــها

واذا حنّوا علي بكلمــات
شيطان وصفوني بيـــها

فيهم من تهمني بالآيـات
شيعي والسنة زاليـــــها

وفيهم من أرماني بالبدعات
أبواب الجنّة علي مفرميها

وكاين الّلي زاد وفــــــات
ملحد،قال والعقيدة نافيــها

هذا حالي مع العبــــــادات
أما السياسة لربّك خلّيـــها

عار علي نرفع الرّايـــات
وعيب رقبتي ليهم نحنيها

تبقى بيناتنا لحترامــــات
والكرامة واجب نحميــها

أبو أسامة عبد الوهاب
سيدي عقبة:5/3/2009