معاكسة تلفون
22-03-2012, 01:05 PM
البارح رن عليا واحد مو عالبال
قالي
مساء الخير شاعرتنا الكريمة
بغيت نسمع صوتك قالوا قتال
ولا شعرك
إلي ينسي الحزن وجحيمه
رديت عليه
منين طلعت لي ياطيب الفال
حسيتو هايم كأنو عامل جريمة
يمكن تحت رجليه ضرب زلزال
ولا بالاك بيني وبينو خصيمة
قال لي
انقطع الصوت ولا سمعي ثقال
عاوديها ياك المصيبة عظيمة
بعد ما سمعتك قلبي ليك مال
أصبحت فحياتي اكبر غنيمة
قلت
وصوتي في وذنك داير موال
لو كان تلعب غيرها هادي قديمة
وانا راني فهمتك في كل الاحوال
قال لي
ياريت تفهمي بالي النوايا سليمة
انا صادق وعمري ماكنت محتال
قلت
انا بنت نحب الحياة المستقيمة
وكلامك بلا فايدة عليا طال
قال لي
يابنت الصحراء واش هذا الدلال
ياك روحي من غيرك يتيمة
راني بسيط وعلى قد الحال
لا تسمعي لاهل العقول العقيمة
البنت ماتخلي عرضها للانذال
والله لو ضاع مايبقى لها قيمة
قلت
لو عندك شئ ارسل مرسال
مرحبا بيه ترحيبة مستديمة
القيم موجودة عندنا مازال
وانا نفهم وماني غشيمة
انسى رقمي و كل شئ انقال
ولا تخلي العواقب بينا وخيمة
قال
ايه فاهم انك ديمة على البال
وانك ماشاء الله عليك فهيمة
قلت
لا تقول الخط ديمة شغال
رايحة نقفل ولا تعتبرها شتيمة